Pretendime të reja kanë ngritur shqetësime serioze rreth privatësisë së përdoruesve të WhatsApp, pasi një hetues i forenzikës dixhitale ka zbuluar se mesazhet e aplikacionit mund të përmbajnë të dhëna të fshehura të vendndodhjes GPS, edhe kur kjo nuk ndahet qëllimisht.
Sipas hetuesit Elorm Daniel, një mesazh i zakonshëm që ai kishte pranuar më 3 shtator u analizua gjatë një kontrolli forenzik, ku pajisja e tij ka zbuluar vendndodhjen e saktë të dërguesit në momentin kur mesazhi ishte dërguar.
“Imagjinoni të merrni një mesazh normal në WhatsApp nga dikush… dhe të zbuloni më vonë se ishte regjistruar fshehurazi vendndodhja e tyre, pa e ndarë fare,” shkroi Daniel.
Ai theksoi se as ai dhe as dërguesi nuk kishin ndarë me vetëdije informacione të vendndodhjes, por metadatat e mesazhit përmbanin koordinata të sakta.
“Ai nuk e ndau qëllimisht. Unë nuk e kërkova. Pajisja e regjistroi automatikisht,” shtoi ai.
Daniel paralajmëron se nëse një smartphone i nënshtrohet imazherisë mjeko-ligjore, një palë e tretë mund të marrë vendndodhjen e dërguesit përmes pajisjes së marrësit, përderisa shërbimet e lokacionit kanë qenë të aktivizuara gjatë bisedës.
“Nëse vendndodhja juaj është aktive gjatë përdorimit të WhatsApp-it, atëherë ajo mund të nxirret nga pajisja e dikujt tjetër në rast të një analize forenzike,” tha ai.
Hetuesi shtoi se procesi i njëjtë ka zbuluar edhe të dhëna të tjera të ruajtura në pajisje, përfshirë llogari dhe fjalëkalime të sinkronizuara, histori të përdorimit të aplikacioneve dhe regjistra të brendshëm – të gjitha këto pa bërë jailbreak apo ndonjë ndërhyrje në softuer.
Ai gjithashtu pretendon se informacionet e WhatsApp, si data e krijimit të grupeve, identitetet e krijuesve dhe historiku i anëtarëve, vazhdojnë të qëndrojnë të dukshme edhe shumë kohë pasi ai kishte dalë nga ato grupe.
Skedarët mediatikë të ruajtur në telefon, sipas tij, mbajnë meta të dhëna të detajuara. Fotot, videot, pamjet e ekranit dhe regjistrimet zanore përfshinin koordinata GPS që tregonin kohën dhe vendin e krijimit të secilit skedar, raporton Anadolu Agency.
Në një përgjigje nga shërbimi i mbështetjes së WhatsApp, u sqarua se enkriptimi fund-më-fund mbron përmbajtjen e mesazheve, përfshirë informacionet e vendndodhjes, dhe se ato mund të lexohen vetëm nga dërguesi dhe marrësi i synuar.
Megjithatë, në rastet mjeko-ligjore, meta të dhënat e nivelit të pajisjes – si koordinatat e vendndodhjes – mund të nxirren gjatë analizës së pajisjes ose kopjeve rezervë.
Sipas WhatsApp-it, problemi lidhet me vetë pajisjen dhe jo drejtpërdrejt me aplikacionin, duke shtuar se meta të dhënat nuk mbrohen me të njëjtin nivel sigurie si përmbajtja e mesazheve. /Gjurmuesi/
