Një vendim i fundit nga institucionet arsimore ka sjellë masa konkrete ndaj një numri mësimdhënësish, pas konstatimit të shkeljeve ligjore në procesin e licencimit.
Ministria e Arsimit, Shkencës, Teknologjisë dhe Inovacionit ka vendosur të tërheqë 16 licenca të mësimdhënësve. Ministrja në detyrë, Arbërie Nagavci, ka deklaruar se licencimi dhe rilicencimi mbeten mekanizma thelbësorë për garantimin e cilësisë dhe standardeve profesionale në sistemin arsimor.
Sipas saj, gjatë një inspektimi në një shkollë të Rahovecit janë evidentuar mospërfillje të procedurave ligjore, çka ka çuar në veprime të menjëhershme nga institucionet përgjegjëse. Nagavci ka bërë të ditur se Këshilli Shtetëror për Licencimin e Mësimdhënësve ka vepruar në bazë të kompetencave të tij ligjore.
“Pas inspektimit tematik të realizuar nga Inspektorati i Arsimit në një shkollë të Rahovecit është konstatuar mospërfillje e procedurave ligjore. Bazuar në këto gjetje, janë dhënë rekomandime konkrete për institucionet përkatëse, të cilat duhet të zbatohen brenda afateve ligjore ndërsa raporti me gjetje i është dërguar paraprakisht Komunës së Rahovecit. Këshilli Shtetëror për Licencimin e Mësimdhënësve ka vepruar në përputhje me kompetencat e tij ligjore”, ka njoftuar Nagavci.
Ajo ka theksuar se ky vendim dëshmon përkushtimin institucional për zbatimin e ligjit dhe ruajtjen e integritetit të proceseve arsimore. Sipas saj, MAShTI do të vazhdojë monitorimin dhe ndërhyrjen në çdo rast të shkeljeve, duke garantuar transparencë, barazi dhe integritet institucional.
“MAShTI do të vazhdojë monitorimin dhe ndërhyrjen në çdo rast të shkeljes, duke garantuar transparencë, barazi dhe integritet institucional. Reformat në arsim kërkojnë përgjegjësi. Ne mbesim të përkushtuar për një arsim cilësor dhe me standard”, ka thënë Nagavci.
