Në një hap të paprecedentë në luftën kundër duhanit, Maldivet kanë miratuar një ligj të ri që ndalon përjetësisht përdorimin dhe shitjen e duhanit për të gjithë personat e lindur pas datës 1 janar 2007. Kjo nismë e vendit ishullor e kthen atë në të parin shtet në botë që zbaton politikën “brez pas brezi” kundër duhanpirjes.
Sipas Ministrisë së Shëndetësisë, qëllimi kryesor i këtij ligji është mbrojtja e brezave të rinj nga varësia ndaj nikotinës dhe efektet e dëmshme që duhani ka në shëndet. Rregullorja e re ndalon jo vetëm përdorimin, por edhe blerjen dhe shitjen e produkteve të duhanit për këtë kategori, duke kërkuar nga tregtarët që të verifikojnë moshën e çdo blerësi.
Kjo masë shihet si pjesë e përpjekjeve të qeverisë për të përmbushur standardet e përcaktuara nga Konventa Kornizë e OBSH-së për Kontrollin e Duhanit, një dokument ndërkombëtar që synon t’i japë fund epidemisë globale të duhanpirjes. /Gjurmuesi/
