Miratohet kërkesa për procedurë të përshpejtuar të projektligjit për ratifikimin e marrëveshjes së pranimit të Shqipërisë në Bordin e Paqes. Kuvendi votoi me 80 vota pro dhe 22 kundër. Kreu i Kuvendit, Niko Peleshi theksoi se është e domosdoshme që Komisioni për Evropën dhe Punët e jashtme të shqyrtojë projektligjin.
Ai theksoi se Komisioni do të mblidhet në sallën “Gerti Bogdani” për rreth një ore e 20 minuta. Sipas tij pas mbledhjes, seanca do te rinisë në orën 12 për vazhduar shqyrtimin dhe votimin e projektligjit. Peleshi më pas ndërpreu seancën e cila pritet të nisë në orën 12:00.
Seanca plenare në Kuvend është hapur me fjalën e kreu të Grupit Parlamentar të PS, Taulant Balla. Balla e ka cilësuar ftesën për “Bordin e Paqes” një moment historik dhe pozitiv për Shqipërinë.
“Sot Kuvendi thirret të marrë një vendim me një kërkesë të veçantë politike e historike, që shkon përtej rendit të zakonshëm të ditës ku Republika e Shqipërisë dhe Rama kanë ftuar të jenë anëtar të Bordit të Paqes. Vlerësim i drejtpërdrejtë për rolin e Shqipërisë dhe një shënon një moment të pa precedent pozitiv ku Shqipëria shihet si faktor që ndikon në paqe, e jo më një shtet periferik. Trump e cilëson këtë nismë si një përpjekje historike dhe madhore si një qasje e re në ndërtimin e paqes, kudo ku sot ka konflikte, me një fokus të veçantë në Gaza. Jo më vëzhgues, jemi ftuar si bashkë themelues”, tha Balla, raporton “Shekulli”.
Nga ana tjetër, kreu i Grupit Parlamentar i PD-së, Gazment Bardhi ngriti pyetjen se pse është urgjente të shqyrtohet ky projekt ligj për Bordin e Paqes 12 orë pasi Këshilli i Ministrave e kaloi në Kuvend.
Sipas tij Kuvendi me kërkese të Këshillit te Ministrave mund te shqyrtojë dhe miratoje një projekt ligj me procedurë të përshpejtuar por jo më parë se një jave nga procedura e shqyrtimit. Ai iu drejtua kryetarit të Kuvendit, Niko Peleshi se Kushtetuta kështu e ka përcaktuar.
“Qytetarët e dëgjuan hartimin por nuk dëgjuan asnjë fjalë se ku qëndron nxitimi i Shqipërisë për ta përmbyllur këtë proces sot. Në 10 minuta fjalë së për çfarë arsye dhe ku qëndron urgjenca e shqyrtimit e këtij projektligji me rëndësi historike tha kolegu. 140 deputetë duhet ta votojnë 12 orë në total pasi ka mbërritur nga Këshilli i Ministrave. Dëgjuat ndonjë argument? Nuk mund të vihet e të bëhet propagandë, nuk mund të talleni me ShBA e të dilni për arritjet historike kur para pak vitesh e keni quajtur presidentin e ShBA turpin e njerëzimit”, tha ai.
Bordi i Paqes
Bordi i Paqes do të krijohet si një organizatë ndërkombëtare me personalitet juridik ndërkombëtar, me mision promovimin e stabilitetit, rivendosjen e qeverisjes së ligjshme dhe sigurimin e paqes së qëndrueshme në territore të prekura ose të kërcënuara nga konflikti. Aktiviteti i tij do të zhvillohet në përputhje me të drejtën ndërkombëtare.
Relacioni thekson se pjesëmarrja e Shqipërisë në Bord përbën një zhvillim me rëndësi të veçantë për politikën e jashtme dhe diplomacinë e vendit. Shqipëria parashikohet të ketë statusin e anëtarit themelues, çka i jep një rol aktiv dhe të barabartë në formësimin e vizionit, parimeve dhe arkitekturës vendimmarrëse të Bordit.
Qeveria argumenton se ky status rrit ndjeshëm profilin ndërkombëtar të Shqipërisë dhe e pozicionon vendin si faktor stabiliteti dhe aktor paqeje, veçanërisht në proceset që synojnë zgjidhjen e konflikteve shumëvjeçare, përfshirë Lindjen e Mesme. Dokumenti e cilëson gjithashtu këtë zhvillim si konfirmim të partneritetit strategjik me ShBA.
