Në Gjermani po zhvillohet dita e dytë e edicionit të 62-të të Munich Security Conference, ku janë mbledhur udhëheqës shtetesh, diplomatë dhe përfaqësues të institucioneve ndërkombëtare për të diskutuar çështjet më të ndjeshme të sigurisë globale.
Pjesë e këtij forumi është edhe kryeministri i Kosovës, Albin Kurti, i cili gjatë qëndrimit në Mynih ka zhvilluar takime me zyrtarë të lartë evropianë. Në fokus të diskutimeve kanë qenë siguria rajonale, thellimi i bashkëpunimit ndërkombëtar dhe zhvillimet e fundit gjeopolitike.
“Kur po bisedojmë me diplomatët dhe politikanët ndërkombëtarë, themi që ne nuk kemi sfida të sigurisë që mund të na cenojnë nga brenda”, ka thënë Kurti.
“Të tilla kemi nga fqinjët tanë veriorë dhe agresivë, por ne jemi duke investuar shumë, si në polici, ashtu edhe në ushtri, me partnerët evropianë, për të forcuar aftësitë dhe masat tona”.
