Kosova renditet ndër vendet më të sigurta në botë për nivelin e kërcënimeve ndaj paqes dhe demokracisë, sipas Normandy Index 2025, një analizë e publikuar nga shërbimi kërkimor i Parlamentit Evropian (EPRS). Ky vlerësim e vendos Kosovën në vendin e 13-të globalisht dhe në krye të Ballkanit Perëndimor për siguri strategjike.
Indeksi nuk mat thjesht qetësinë e dukshme të një shteti, por ekspozimin ndaj rreziqeve reale si destabilizimi politik, dezinformimi, presioni i jashtëm, krizat ekonomike, pasiguria energjetike dhe kërcënimet hibride. Bashkimi Evropian e përdor këtë instrument për të identifikuar rreziqet dhe kapacitetet për t’i përballuar ato.
Në krahasim me vendet e tjera të rajonit, Kosova dallon për reziliencë të lartë institucionale dhe shoqërore, megjithëse sfida kryesore mbetet përballja me dezinformimin e importuar. Shqipëria renditet në vendin e 20-të, me performancë të qëndrueshme dhe rreziqe të menaxhueshme, ndërsa Mali i Zi (21) shënon një përmirësim të dukshëm, duke u renditur ndër vendet me ngritjen më të madhe globale.
Maqedonia e Veriut (26) ka pësuar një rënie të lehtë për shkak të tensioneve politike dhe dobësive institucionale, ndërsa Serbia (41) tregon probleme të theksuara në proceset demokratike dhe reziliencën ndaj dezinformimit. Raporti vëren gjithashtu lidhjet strategjike të Serbisë me Rusinë dhe pjesëmarrjen në iniciativën 16+1 të udhëhequr nga Kina, të cilat rrisin ekspozimin ndaj presioneve gjeopolitike. Bosnjë e Hercegovina (54) mbetet ndër më të brishtat në rajon, me institucione të dobëta dhe rrezik të vazhdueshëm destabilizimi.
Në plan global, vendet e Bashkimit Evropian shfaqin një profil më të sigurt krahasuar me mesataren globale. Ndërkohë, raporti evidenton se Rusia dhe Kina shënojnë rënie të ndjeshme në siguri strategjike, ndërsa Shtetet e Bashkuara kanë përmirësime të dukshme. Mesatarja globale e indeksit për vitin 2025 është 5.79 nga 10, duke treguar një botë më të pasigurt se më parë, por ende nën kontroll.
