Komiteti i Rajoneve i Bashkimit Evropian ka njoftuar Asociacionin e Komunave të Kosovës se në opinionin e tij më të fundit lidhur me Paketën e Zgjerimit të BE-së 2025 për Ballkanin Perëndimor dhe Turqinë është marrë vendimi që në dokumentet dhe komunikimet publike të mos përdoret më emërtimi “Kosovë” me asteriks*, por thjesht “Kosovë”.
Sipas njoftimit të publikuar nga Asociacioni i Komunave të Kosovës në Facebook, ky vendim do të vlejë për të gjitha dokumentet dhe komunikimet zyrtare të Komitetit të Rajoneve. Me këtë hap, ky institucion harmonizon qasjen e tij me qëndrimin e Parlamentit Evropian, i cili tashmë përdor emërtimin “Kosovë” pa asteriks në dokumentet e tij zyrtare.
Në të njëjtin opinion, Komiteti i Rajoneve ka bërë thirrje edhe për heqjen e masave të Bashkimit Evropian ndaj Kosovës, duke theksuar se këto masa kanë pasur ndikim të drejtpërdrejtë në komunat dhe qytetarët e vendit.
“Ky paraqet një zhvillim shumë të rëndësishëm politik dhe institucional për Kosovën në nivel evropian. Komiteti i Rajoneve vlerëson gjithashtu organizimin e suksesshëm të zgjedhjeve lokale në Kosovë në vitin 2025, duke theksuar se pjesëmarrja e të gjitha komuniteteve ka forcuar legjitimitetin e institucioneve komunale dhe funksionimin e demokracisë lokale. Në opinion theksohet se, me rikthimin e pjesëmarrjes demokratike në nivel lokal, arsyet fillestare për vendosjen e masave të BE-së ndaj Kosovës nuk qëndrojnë më, dhe për këtë arsye Komisioni Evropian ftohet që t’i heqë ato sa më parë”, thuhet në njoftim.
Sipas njoftimit, Asociacioni i Komunave të Kosovës ka luajtur një rol aktiv në promovimin e rolit të pushtetit lokal në proceset evropiane dhe në ngritjen e çështjeve që lidhen me komunat e Kosovës në institucionet e Bashkimit Evropian.
“Përmes bashkëpunimit të vazhdueshëm me Komitetin e Rajoneve të BE-së, rrjetet evropiane të qeverisjes lokale dhe partnerët ndërkombëtarë, AKK ka kontribuar në:
promovimin e rolit të komunave në procesin e integrimit evropian të Kosovës;
informimin e partnerëve evropianë për ndikimin që masat e BE-së kanë pasur në komunat dhe qytetarët e Kosovës;
forcimin e bashkëpunimit ndërmjet komunave të Kosovës dhe institucioneve evropiane.
Asociacioni i Komunave të Kosovës do të vazhdojë të angazhohet në mënyrë aktive për forcimin e rolit të komunave në procesin e integrimit evropian të Kosovës dhe për përfaqësimin e interesave të pushtetit lokal në institucionet evropiane.
Drejtori Ekzekutiv i AKK-së, Sazan Ibrahimi, e ka vlerësuar këtë zhvillim si një lajm shumë të rëndësishëm për Kosovën.
“Ky është një lajm shumë i mirë për Kosovën dhe për komunat tona. Është shumë inkurajuese që institucionet evropiane po e njohin rolin e pushtetit lokal dhe ndikimin që vendimet e tyre kanë në jetën e qytetarëve në nivel lokal. Po ashtu, rekomandimi për përdorimin e emrit ‘Kosovë’ pa asteriks është një zhvillim shumë i rëndësishëm në trajtimin institucional të Kosovës në nivel evropian”.
