Një aksident i rëndë hekurudhor ka ndodhur të enjten në qytetin Kunming të Kinës, ku një tren është përplasur me një grup punëtorësh të linjës, duke shkaktuar humbjen e jetës së 11 personave dhe plagosjen e dy të tjerëve. Ky konsiderohet aksidenti më fatal i këtij lloji në vend gjatë më shumë se dhjetë viteve të fundit.
Sipas zyrtarëve lokalë, treni ishte duke kryer teste të pajisjeve të zbulimit të tërmeteve në momentin kur ka goditur punëtorët. Ngjarja ka ndodhur në një segment të lakuar të binarëve, në stacionin hekurudhor Luoyang Town të qytetit.
Autoritetet njoftuan se stacioni, i cili ndodhet në provincën Yunnan, tashmë ka rifilluar funksionimin normal. Ndërkohë, hetimet për të zbuluar shkakun e saktë të aksidentit janë duke vazhduar, siç është bërë e ditur në deklaratën zyrtare. /Gjurmuesi/
