Shumë njerëz e lidhin vitaminën D vetëm me ekspozimin në diell, por roli i saj shkon shumë më larg sesa kaq. Kjo vitaminë është thelbësore për funksionimin normal të organizmit dhe ndikon drejtpërdrejt jo vetëm në kocka dhe dhëmbë, por edhe në peshë, humor dhe energjinë e përditshme.
Vitamina D përthithet nga lëkura gjatë ekspozimit ndaj rrezeve të diellit dhe është e domosdoshme për shëndetin e përgjithshëm të trupit. Ajo luan rol të rëndësishëm në forcimin e sistemit imunitar dhe në funksionimin korrekt të sistemit nervor qendror.
Pak njerëz e dinë se kjo vitaminë ka ndikim të drejtpërdrejtë edhe në procesin e dobësimit. Nëse po përpiqeni të humbni peshë, është e rëndësishme që fillimisht të kontrolloni nivelin e vitaminës D në gjak dhe më pas të ndiqni një dietë të balancuar, të pasur me ushqime që e përmbajnë atë.
Vitamina D ndihmon në reduktimin e indit dhjamor dhe vepron si faktor natyral dobësues. Ajo gjithashtu rregullon ndjesinë e urisë, e cila shpesh është më e theksuar te personat me mungesë të kësaj vitamine. Uria e vazhdueshme është një nga shkaqet kryesore të obezitetit.
Zgjedhja e ushqimeve që ngopin dhe janë të pasura me vitaminë D ndihmon në shmangien e konsumit të shpeshtë të ushqimit. Kjo vitaminë ndikon edhe në rritjen e nivelit të testosteronit, hormon që ndihmon në djegien e yndyrnave, përmirëson tonifikimin e muskujve dhe rrit masën muskulore, veçanërisht kur kombinohet me aktivitet fizik dhe një regjim ushqimor të shëndetshëm.
Personat me nivel të ulët të vitaminës D janë më të prirë të kenë probleme me hidratimin e trupit dhe me shfaqjen e celulitit, shqetësime që hasen më shpesh te femrat. Te individët shumë mbipeshë, mungesa e kësaj vitamine është shpesh kronike, pasi vitamina D grumbullohet në indin dhjamor dhe nuk përthithet siç duhet nga organizmi.
Në rastet kur analizat e gjakut tregojnë mungesë të theksuar të vitaminës D, rekomandohet fillimi i një diete të shëndetshme, konsumimi i ushqimeve të pasura me këtë vitaminë ose marrja e suplementeve ushqimore.
Mungesa e vitaminës D nuk ndikon vetëm në shtimin në peshë, por edhe në gjendjen psikologjike. Ajo lidhet drejtpërdrejt me rregullimin e humorit dhe mirëqenien mendore, pasi ndikon në nivelin e serotoninës. Kur kjo e fundit është e ulët, shfaqen probleme si pagjumësia, gjumi i shqetësuar dhe ndjenja e lodhjes së vazhdueshme.
