Java Kundër Korrupsionit 2025 ka nisur me një veprim të pazakontë nga tri organizata të shoqërisë civile, të cilat vendosën t’i mbyllin zyrat për një ditë si formë proteste ndaj gjendjes së institucioneve dhe mungesës së reformave.
Koalicioni i përbërë nga Instituti i Kosovës për Drejtësi (IKD), Lëvizja FOL dhe Iniciativa për Progres (INPO) njoftoi se greva njëditore është përgjigje ndaj paralajmërimeve të vazhdueshme që, sipas tyre, janë neglizhuar nga institucionet e vendit.
Gjatë konferencës, hulumtuesja e lartë ligjore e IKD-së, Arrita Rezniqi, tha se ky vendim përfaqëson një mesazh të drejtpërdrejtë kundër praktikave që po e dëmtojnë funksionimin e shtetit.
“Sot, ne kemi vendosur ta nisim këtë javë me një veprim simbolik, të cilin e keni parë edhe para ndërtesës, ku baneri i shpalosur njofton për mbajtjen e grevës njëditore, si formë proteste kundër korrupsionit dhe kundër politikave që po e paralizojnë funksionimin e shtetit. Vendosëm të hyjmë në grevë sepse si organizata të shoqërisë civile në vazhdimësi kemi reaguar ndaj shkeljeve të ligjit, kapjes së institucioneve, stagnimit të reformave dhe kemi bërë thirrje për domosdoshmëri të luftës kundër korrupsionit. Kjo vazhdimësi e jona kemi paralajmëruar për fenomenet që sot janë bërë sistemike, por përkundër angazhimit tonë, analizave konkrete dhe rekomandimeve të ofruara, nuk ka pasur fatkeqësisht reagim nga institucionet shtetërore, nuk ka pasur reflektim dhe nuk ka pasur angazhim konkret në adresimin e këtyre çështjeve”, tha ajo.
Rezniqi paraqiti listën e problemeve që, sipas saj, dëshmojnë gjendjen e rënduar në institucione. Ajo potencoi mungesën e reformave dhe ngecjet që e rrezikojnë funksionimin e sistemit të drejtësisë.
“Mungesa e reformës së plotë në drejtësi, mos fillimi i vettingut në drejtësi, korporatizimi në sistemin prokurorial, ligjet kundër-kushtetuese, mungesa e Strategjisë kundër Korrupsionit, pezullimi i dialogut strategjik nga SHBA-ja, mungesa e dialogut social, sulmet ndaj gazetarëve, shoqërisë civile, institucioneve të drejtësisë, e bllokimi i fondeve të planit të rritjes së BE-së, janë vetëm disa prej ngjarjeve dhe problemeve që në vazhdimësi po e dëmtojnë jetën e qytetarëve, sundimin e ligjit, zhvillimin ekonomik dhe besimin në demokraci”, tha ajo.
Ajo shtoi se greva nuk është vetëm simbolike, por një thirrje e qartë për veprim të menjëhershëm, duke kërkuar që institucionet të marrin përgjegjësitë e tyre.
“Për këto arsye, ndër të tjera, ne e kemi vlerësuar të nevojshme që sot të japim një mesazh të fortë dhe të qartë se vendi jonë ka nevojë për veprime konkrete, për përgjegjësi dhe institucione funksionale dhe mbi të gjitha ka nevojë për sundim të ligjit, e jo për inkurajim të korrupsionit. Ky veprim yni sot është thirrje për të gjitha institucionet e shtetit, për respektim të mandatit kushtetues, përgjegjësisë publike dhe detyrimit për të garantuar integritet, transparencë dhe funksionim demokratik”, tha ajo. /Gjurmuesi/
