Në Klinikën e Onkologjisë në Qendrën Klinike Universitare të Kosovës është përuruar akseleratori më i ri me vlerë 1.6 milion euro, i cili ofron mundësi për trajtim me saktësi të lartë të tumorëve pa dëmtuar indet përreth. Ky investim konsiderohet një hap i madh drejt përmirësimit të trajtimit të pacientëve dhe kushteve për stafin mjekësor.
Kryeministri në detyrë, Albin Kurti, dhe ministri i Shëndetësisë në detyrë, Arben Vitia, vlerësuan transformimin e Klinikës, duke e cilësuar si shembull jo vetëm për Kosovën, por edhe për rajonin. “Klinika e Onkologjisë ka përjetuar një transformim rrënjësor gjatë këtij mandati, duke përmirësuar jashtëzakonisht trajtimin e pacientëve dhe kushtet për mjekët dhe infermierët. Numri i shtretërve është dyfishuar, nga 45 në 110, ndërsa investimi në bunker me hapësira përcjellëse, me vlerë 2.7 milion euro, u përfundua në vetëm pesë muaj,” tha Kurti, duke përmendur gjithashtu akseleratorin me sistemin e avancuar SIRAG.
Ai theksoi edhe rritjen e buxhetit për barnat esenciale për pacientët me sëmundje malinje, i cili ka shkuar nga 8 milion euro në vitin 2019 në 19 milion euro aktualisht.
Ministri Vitia shtoi se ky është akseleratori i tretë në klinikë, duke mundësuar që pacientët të marrin shërbime në institucionet publike pa u detyruar të shkojnë jashtë vendit. “Ky akselerator modern do t’u shërbejë qytetarëve për trajtimin me rrezet X pa asnjë listë pritjeje. Ky është një dhuratë për fundvit për klinikën dhe pacientët. Do të vazhdojmë investimet në mënyrë që të gjitha shërbimet shëndetësore të jenë të disponueshme brenda institucioneve publike,” u shpreh Vitia. /Gjurmuesi/
