Çmimi Oscar konsiderohet një nga vlerësimet më prestigjioze në industrinë e filmit. Për dekada me radhë, statuja e artë që u jepet fituesve është shndërruar në një simbol global të arritjes dhe suksesit në botën e kinemasë.
Trofeu i famshëm ka një histori interesante që lidhet me krijimin e tij, simbolikën e dizajnit dhe origjinën e emrit “Oscar”, i cili sot është më i njohur se vetë emri zyrtar i çmimit.
Për gati një shekull, statuja e artë që jepet në ceremoninë e Academy Awards është bërë një nga simbolet më të njohura të kinemasë në botë.
Statuja simbolizon një kalorës që mban një shpatë dhe qëndron mbi një bobinë filmi. Dizajni u konceptua në vitin 1928 nga drejtori artistik Cedric Gibbons, i cili punonte për studion legjendare Metro-Goldwyn-Mayer dhe ishte një nga themeluesit e Academy of Motion Picture Arts and Sciences.
Sipas historisë zyrtare të Akademisë, Gibbons vizatoi figurën e një kalorësi që qëndron mbi një bobinë filmi me pesë rreze. Këto pesë rreze simbolizonin pesë degët origjinale të Akademisë: aktorët, regjisorët, producentët, teknikët dhe skenaristët.
Modeli i vizatuar u kthye në skulpturë nga artisti George Stanley, i cili i dha trofeut formën elegante në stilin Art Deco që është ruajtur pothuajse e pandryshuar deri sot.
Edhe pse çmimi quhet zyrtarisht Academy Award, emri “Oscar” është bërë shumë më i famshëm. Origjina e këtij emri mbetet disi e paqartë dhe ka disa versione.
Një nga historitë më të njohura lidhet me bibliotekaren e Akademisë, Margaret Herrick, e cila thuhet se kur pa statujën për herë të parë në vitet ’30, tha se ajo i ngjante xhaxhait të saj Oscar. Gazetarët e Hollywood-it filluan ta përdornin këtë emër që ka mbetur edhe sot.
Një tjetër pretendim vjen nga aktorja Bette Davis, e cila më vonë tha se e kishte quajtur statujën “Oscar” pasi pjesa e pasme e saj i kujtonte bashkëshortin e saj të parë, Harmon Oscar Nelson.
Megjithatë, vetëm në vitin 1939 Akademia e bëri zyrtare përdorimin e emrit “Oscar”.
Statuja e Oscar-it është rreth 34 centimetra e lartë dhe peshon afërsisht 3.8 kilogramë. Ajo prodhohet nga bronzi dhe më pas lyhet me një shtresë ari 24-karatësh.
Procesi i prodhimit kërkon disa javë dhe çdo statujë lustrohet me kujdes përpara ceremonisë. Për të ruajtur prestigjin e çmimit, fituesit nuk lejohen ta shesin trofeun e tyre pa ia ofruar më parë Akademisë për vetëm
Që nga ceremonia e parë në vitin 1929, Oscar-i është bërë simboli më i madh i suksesit në industrinë e filmit dhe mbetet një nga trofetë më të dëshiruar në botën e kinemasë.
