Google ka prezantuar një përditësim të ri për shfletuesin Chrome, që sjell një funksionalitet të ri të quajtur “AI Mode”, i cili duket drejtpërdrejt nën kutinë e kërkimit në pajisjet mobile.
Ky opsion është tashmë i disponueshëm për përdoruesit në SHBA në platformat iOS dhe Android, ndërsa pritet që gjatë javëve të ardhshme të shtrihet globalisht në mbi 160 vende. Butoni vendoset mbi shkurtesat e faqeve më të vizituara, duke mundësuar që përdoruesit të hyjnë menjëherë në AI Mode sapo të hapin një tab të ri. Qëllimi i Google është që përdoruesit të përdorin këtë opsion para se të drejtohen te konkurrentët si ChatGPT apo Perplexity.
AI Mode ofron qasje të menjëhershme në kërkimin me AI të Google, mbështet disa gjuhë dhe mundëson marrjen e përgjigjeve, përmbledhjeve dhe rekomandimeve pa pasur nevojë për aplikacione ose shërbime shtesë. Përveç kësaj, përditësimi përfshin përmirësime në “agentic AI”, që lejojnë rezervimin automatik të biletave për ngjarje ose termine në sallone lokale.
Ndërkohë, konkurrenca nuk qëndron pasive: Perplexity po zhvillon shfletuesin e vet Comet, ndërsa OpenAI po punon në Atlas, një shfletues AI që synon të ndryshojë mënyrën se si përdorim internetin. Përdoruesit e Chrome mund të përditësojnë shfletuesin e tyre, dhe AI Mode duhet të shfaqet automatikisht në tab-et e reja. /Gjurmuesi/
