Një përplasje e re ligjore po zhvillohet mes Elon Musk dhe dy prej emrave më të mëdhenj të teknologjisë globale, OpenAI dhe Microsoft, ku miliarderi amerikan po kërkon një dëmshpërblim që arrin deri në 134 miliardë dollarë.
Sipas padisë, Musk pretendon se OpenAI ka përfituar nga mbështetja e tij e hershme me një vlerë që llogaritet mes 65.5 miliardë dhe 109.4 miliardë dollarë, në periudhën kur ai ishte bashkëthemelues i kompanisë nga viti 2015. Ndërkohë, Microsoft, sipas tij, ka përfituar nga 13.3 deri në 25.1 miliardë dollarë nga ky bashkëpunim.
OpenAI i ka hedhur poshtë këto pretendime, duke e cilësuar padinë si “të pabazuar” dhe pjesë të një fushate “ngacmimi” nga ana e Musk. Edhe Microsoft ka kundërshtuar akuzat, ku një përfaqësues ligjor i kompanisë ka deklaruar se nuk ekzistojnë prova që ajo “e ka ndihmuar dhe inkurajuar” OpenAI-n.
Të dyja kompanitë kanë paraqitur qëndrime të veçanta ligjore për të kundërshtuar kërkesën për dëmshpërblim të Musk.
Musk, i cili u largua nga OpenAI në vitin 2018 dhe aktualisht drejton kompaninë e inteligjencës artificiale xAI, pretendon se OpenAI ka shkelur misionin e saj themelues duke u shndërruar në një strukturë fitimprurëse përmes një ristrukturimi të profilit të lartë.
Këtë muaj, një gjyqtar në Oakland të Kalifornisë vendosi që çështja të shqyrtohet nga një juri, ndërsa gjykimi pritet të nisë në muajin prill.
Në dokumentet gjyqësore thuhet se Musk ka kontribuar rreth 38 milionë dollarë, që përbënin rreth 60 për qind të financimit të hershëm të OpenAI-së. Ai gjithashtu ka ndihmuar në rekrutimin e stafit, ka lidhur themeluesit me kontakte kyçe dhe i ka dhënë projektit besueshmëri në fazat e para të krijimit.
Sipas padisë, vlerësimi i kontributeve të Musk për OpenAI dhe Microsoft është bërë nga dëshmitari i tij ekspert, ekonomisti financiar C. Paul Wazzan.
Nëse juria i shpall njërën ose të dyja kompanitë përgjegjëse, Musk mund të kërkojë dëmshpërblim ndëshkues dhe masa të tjera ligjore, përfshirë edhe një urdhër të mundshëm ndalimi, megjithëse dokumentet nuk sqarojnë se çfarë forme konkrete mund të ketë një vendim i tillë.
