Ndërkohë që në shumicën e komunave të Kosovës po diskutohet një rritje e re e çmimit të energjisë elektrike nga kjo pranverë, situata paraqitet ndryshe në katër komunat me shumicë serbe në veri të vendit. Banorët e këtyre zonave nuk pritet të përballen me shtrenjtim të rrymës as gjatë këtij viti.
Në reagimin e saj të parë publik që nga licencimi në vitin 2022, kompania Elektrosever ka bërë të ditur se nuk planifikon ndryshime në tarifat aktuale të energjisë elektrike.
“Kompania Elektrosever nuk planifikon të rrisë çmimet e energjisë elektrike për momentin. Ne monitorojmë me kujdes dhe vazhdimisht situatën në treg dhe marrim në konsideratë të gjithë faktorët përkatës që ndikojnë në formimin e çmimeve”, thuhet në deklaratën e kompanisë.
Elektrosever është furnizuesi i licencuar për Mitrovicën e Veriut, Zveçanin, Leposaviqin dhe Zubin Potokun, ndërsa tarifat që aplikon aktualisht janë nga 12 deri në 22 për qind më të ulëta krahasuar me ato të Furnizuesit të Shërbimit Universal, përkatësisht KESCO-s.
Në rast se Zyra e Rregullatorit për Energji do të miratonte propozimin e KESCO-s për rritje të çmimit prej 21.3 për qind, ky dallim mes tarifave do të thellohej edhe më shumë.
Në një skenar hipotetik, nëse rritja e propozuar do të hynte në fuqi, për konsum mujor nën 800 kilovatë orë, tarifat e Elektroseverit do të ishin rreth 48 për qind më të ulëta.
Ndërkohë, për konsumin mbi 800 kilovatë orë, dallimi do të ishte 36 për qind për tarifën e lartë (ditore) dhe 47 për qind për tarifën e ulët (të natës).
Edhe pse Elektrosever operon jashtë tregut të rregulluar të energjisë, Zyra e Rregullatorit për Energji nuk ka kthyer përgjigje lidhur me pyetjet për këto dallime të theksuara në tarifa brenda territorit të Kosovës.
