Një ekip i Bundeswehr-it nga Gjermania është larguar papritur nga Grenlanda vetëm pak ditë pas mbërritjes së tij, duke habitur mediat dhe analistët ndërkombëtarë.
Informacioni u konfirmua nga zëdhënësi i Ministrisë gjermane të Mbrojtjes, ndërsa lajmin e raportuan së pari gazetat gjermane Bild dhe Der Spiegel. Sipas Bild, ushtarët u njoftuan për largimin herët në mëngjes, pa paralajmërime të mëparshme.
Gazetari Moritz Müller, që mbulonte rastin, tha: “Dje ishte ende e paqartë se sa gjatë do të qëndronte ekipi”.
Në total, 15 ushtarë gjermanë nën komandën e Admiralit Stefan Pauly u panë në aeroportin e Nuuk të dielën pasdite sipas kohës gjermane, ku hipën në një fluturim të rregullt të Icelandair për në Keflavik të Islandës. Nisja u vonua pak për shkak të akullit në pistë.
Sipas raportimeve, të shtunën u përfol se ekipi mund të qëndronte më gjatë se planifikuar, por kjo nuk ndodhi, pa njoftime shtesë ose informacion zyrtar nga Berlini.
