Një ngjarje e rëndë është regjistruar mbrëmjen e së dielës në Suharekë, ku një fëmijë i moshës 8 vjeçare ka humbur jetën.
Vajza është dërguar pa shenja jete nga Qendra Kryesore e Mjekësisë Familjare në Suharekë në repartin e Emergjencës, ku mjekët kanë konstatuar se ajo tashmë ishte pa shenja vitale.
Rastin e ka konfirmuar zëdhënësi i Policisë për rajonin e Prizrenit, Shaqir Bytyqi, i cili bëri të ditur se njësitet policore dhe hetuesit kanë dalë në vendin e ngjarjes.
“Me datën 14.12.2025, rreth orës 21:50 nga QKMF-Suharekë është raportuar se një fëmijë i gjinisë femërore rreth 8-vjeçare, nga fshati Greiçevcë, Suharekë është sjellë në repartin e Urgjencës pa shenja jete. Patrullat policore dhe hetuesit policor kanë dalë në vendin e ngjarjes dhe janë informuar nga mjeku kujdestar se fëmija, në momentin e pranimit në Urgjencë, nuk ka pasur shenja jete”, thuhet në konfirmim.
Sipas Bytyqit, për rastin është njoftuar Prokurori për Krime të Rënda dhe është iniciuar procedura “Hetim i vdekjes”.
“Trupi i pajetë, me urdhër të Prokurorit kompetent, është dërguar për obduksion”, ka njoftuar ai.
Shkaqet e vdekjes mbeten ende të panjohura.
