Një histori e pazakontë ka tërhequr vëmendjen në rrjetet sociale: një djalë trevjeçar që ka zhvilluar një pasion të jashtëzakonshëm për makinat larëse të rrobave. Në një moshë kur shumica e fëmijëve mahniten nga lodrat klasike, ai ka zgjedhur pajisjet shtëpiake si interesin e tij kryesor.
Teddy, nga Sunderland në Mbretërinë e Bashkuar, u bë viral pasi nëna e tij, Rachael, ndau në TikTok dashurinë e tij të veçantë për këto pajisje. Sipas saj, gjithçka nisi kur ai ishte rreth një vjeç dhe qëndronte ulur për rreth 40 minuta – aq sa zgjat një cikël larjeje – duke vëzhguar makinën në punë.
Ajo thekson se makinat larëse janë e vetmja gjë për të cilën ai ka qenë kaq i fiksuar ndonjëherë.
Më 15 shkurt, Rachael publikoi një përmbledhje fotografish në TikTok që tregonte hobin e pazakontë të djalit të saj. Fillimisht, ajo bëri shaka duke thënë se tani ai duhet të pëlqejë vetëm makinat dhe dinosaurët, por fotot pasuese zbuluan të vërtetën: Teddy kishte krijuar një koleksion lodrash të makinave larëse në ngjyra të ndryshme, së bashku me kosha të vegjël për rroba dhe detergjentë.
Në një nga imazhet ai shihet i veshur me uniformën e një dyqani të madh britanik të pajisjeve elektrike, Currys, që sipas nënës së tij është “vendi i tij i preferuar në botë”. Fotot e tjera e tregojnë duke u argëtuar me makinat, duke kontrolluar pajisje të vërteta në dyqan, si dhe një tortë me temë makine larëse në festën e tretë të ditëlindjes.
Postimi mori shpejt vëmendje të madhe, duke grumbulluar mbi 93 mijë pëlqime. Shumë prindër ndanë në komente histori të ngjashme për pasionet e veçanta të fëmijëve të tyre, ndërsa llogaria zyrtare e Currys reagoi duke e quajtur Teddy-n “një legjendë absolute”.
Një ditë më vonë, më 16 shkurt, Rachael publikoi një video të re ku e çon djalin në një vizitë në Currys – një udhëtim ëndrrash për të. Në pamje, ai vrapon me entuziazëm mes rafteve për të parë modelet e preferuara. Sipas saj, ai “nuk e kupton mjaftueshëm që ka bërë jehonë në internet”, por kur ajo i ka lexuar komentet, ai është gëzuar shumë prej tyre.
