Aleanca Kosovare e Bizneseve ka reaguar pas miratimit të vendimit për rritjen e pagës minimale, duke theksuar se përmirësimi i standardit jetësor të punëtorëve dhe rritja e të ardhurave janë objektiva legjitime dhe të domosdoshme për zhvillimin ekonomik dhe social të vendit.
Megjithatë, AKB vlerëson se mënyra se si është marrë ky vendim ngre shqetësime serioze. Sipas saj, vendimi është miratuar pa përfshirjen e sektorit privat, pa konsultime paraprake dhe pa një analizë të detajuar të ndikimit financiar, veçanërisht për mikrondërmarrjet dhe bizneset e vogla, të cilat përbëjnë shtyllën kryesore të ekonomisë së Kosovës.
Aleanca paralajmëron se mungesa e një analize gjithëpërfshirëse rrezikon që një numër biznesesh, të pafuqishme për të përballuar rritjen e kostove, të shtyhen drejt informalitetit, duke e vënë në pikëpyetje vetë qëllimin e reformës.
“Ne nuk jemi kundër rritjes së pagës minimale, por kërkojmë që vendime të tilla të rëndësishme të merren përmes dialogut social, në bashkëpunim me përfaqësuesit e biznesit dhe sindikatat, dhe të shoqërohen me masa lehtësuese fiskale apo mbështetëse, sidomos për bizneset e vogla”.
Në reagimin e saj, AKB shpreh gjithashtu pakënaqësi për faktin se veteranët e Ushtrisë Çlirimtare të Kosovës nuk janë përfshirë në politika të veçanta mbështetëse edhe në këtë rast, pavarësisht kontributit dhe sakrificës së tyre për lirinë e vendit. Sipas Aleancës, çdo reformë sociale dhe ekonomike duhet të ndërtohet mbi parimin e drejtësisë dhe ndjeshmërisë ndaj kësaj kategorie.
Në fund, AKB i bën thirrje Ministrisë së Financave, Punës dhe Transfereve që të rifillojë dialogun me sektorin privat dhe të ndërmarrë hapa konkretë për të garantuar që rritja e pagës minimale të jetë e qëndrueshme, e zbatueshme dhe pa efekte negative për ekonominë formale të vendit.
