Një incident ka ndodhur sot në aeroportin ndërkombëtar “Sabiha Gökçen” në Stamboll, ku një avion pasagjerësh i kompanisë AJet, që operonte fluturimin Prishtinë–Stamboll, ka dalë nga pista menjëherë pas uljes.
Avioni i tipit Boeing 737-800 u ul në pistën e re 06R/24L, por devijoi nga aksi i taksimit dhe përfundoi në një terren të butë pak çaste pas prekjes së tokës.
Si pasojë, kompania menaxhuese e aeroportit ka lëshuar një NOTAM, duke njoftuar se pista 06R/24L do të mbetet e mbyllur për trafik deri në njoftimin e radhës. Mbyllja e pistës kryesore gjatë orëve të ngarkuara ka shkaktuar vonesa të konsiderueshme, ndërsa disa avionë janë detyruar të kryejnë pasim ose të përsërisin procedurat e uljes.
Ekipet emergjente dhe ato teknike janë dërguar menjëherë në vendngjarje, ndërsa aktualisht po zhvillohen punimet për nxjerrjen e avionit në mënyrë të sigurt nga terreni ku ka mbetur i bllokuar. Sipas informacionit të deritanishëm, nuk raportohet për persona të lënduar.
Autoritetet turke kanë bërë të ditur se pista do të qëndrojë e mbyllur deri në përfundimin e operacionit të shpëtimit dhe rikthimit të avionit në pistë. Paralelisht, SHGM (Drejtoria e Aviacionit Civil e Turqisë) dhe administrata e aeroportit kanë nisur hetimet për të përcaktuar shkaqet e këtij incidenti. /Gjurmuesi/
