Këshilli Prokurorial i Kosovës ka mbajtur një mbledhje të jashtëzakonshme ku është diskutuar dorëheqja e prokurorit të Shtetit, Jeton Koca. Njoftimi për largimin e tij nga detyra është dorëzuar më herët dhe është shqyrtuar nga anëtarët e Këshillit gjatë kësaj mbledhjeje.
Kryesuesi i KPK-së, Arian Gashi, bëri të ditur se dorëheqja e Kocës është paraqitur më 13 shkurt të këtij viti dhe se arsyet për këtë vendim janë personale.
“Ju njoftojmë se më 13 shkurt 2026 kemi pranuar nga prokurori i Prokurorisë Themelore në Prishtinë, zoti Jeton Koca, njoftimin për dorëheqjen nga pozita e prokurorit të Shtetit. Koca ka njoftuar se arsyet e dorëheqjes janë personale dhe nuk do t’i bëjë publike në këtë dokument”, tregoi Gashi.
