Procesi i integrimit të Serbisë në Bashkimin Evropian po përballet me ngecje të dukshme, duke ngritur shqetësime në institucionet evropiane për standardet demokratike dhe respektimin e lirive themelore në vend. Një draft-raport i përgatitur në Parlamentin Evropian thekson se përparimi i Beogradit në përmbushjen e kritereve të anëtarësimit ka qenë shumë i kufizuar gjatë viteve të fundit.
Dokumenti, i nënshkruar nga raportuesi për Serbinë në Parlamentin Evropian, Tonino Picula, thekson mangësi në disa fusha kyçe, përfshirë pavarësinë e gjyqësorit, luftën kundër korrupsionit dhe krimit të organizuar, si dhe lirinë e medias dhe reformën e administratës publike.
Raporti ngre gjithashtu shqetësime për zhvillimet politike në vend, duke përmendur protestat masive që nisën në nëntor të vitit 2024. Në këtë kontekst përmendet përdorimi i tepërt i forcës nga autoritetet, arrestimet arbitrare dhe forma të ndryshme frikësimi ndaj qytetarëve, aktivistëve dhe gazetarëve.
Parlamenti Evropian kërkon hetime të paanshme dhe transparente për çdo rast të përdorimit të panevojshëm të forcës, si dhe rishikimin e ndryshimeve të fundit në ligjet që lidhen me sistemin gjyqësor, të cilat sipas raportit mund të dobësojnë pavarësinë e tij.
Një pjesë e veçantë e draft-raportit i kushtohet situatës së sigurisë në veri të Kosovës dhe sulmit terrorist në Banjska në vitin 2023. Në dokument theksohet se Kosova dhe Serbia duhet të bashkëpunojnë plotësisht për të sjellë para drejtësisë personat përgjegjës për këtë sulm, duke përfshirë edhe Milan Radoiçiq, ish-nënkryetarin e Listës Serbe.
Sipas raportit, ai ende nuk është ndjekur penalisht nga autoritetet serbe, gjë që përmendet si një mangësi serioze. Parlamenti Evropian e konsideron këtë situatë si një pengesë të rëndësishme në rrugën e Serbisë drejt integrimit në Bashkimin Evropian.
Raporti thekson gjithashtu se normalizimi i marrëdhënieve ndërmjet Kosovës dhe Serbisë mbetet një element kyç për avancimin e perspektivës evropiane të Beogradit.
