Një incident tragjik ndodhi të martën në Zvicrën perëndimore, ku një autobus u përfshi nga flakët duke shkaktuar vdekjen e të paktën gjashtë personave dhe plagosjen e tre të tjerëve. Autoritetet po hetojnë ngjarjen, ndërsa dyshohet se zjarri mund të jetë shkaktuar qëllimisht nga një pasagjer.
Sipas policisë, autobusi mori flakë në një rrugë në Kerzers, një qytet i vogël në kantonin e Fribourg, rreth 20 kilometra nga kryeqyteti zviceran, Berna.
“Në këtë fazë, kemi elementë që sugjerojnë një akt të qëllimshëm nga një person që ishte brenda autobusit,” tha Frederic Papaux, një zëdhënës i policisë së Fribourg.
Hetuesit po shqyrtojnë raportimet se një person kishte derdhur karburant mbi veten para se të ndodhte zjarri, bëri të ditur Christa Bielmann, zëdhënëse tjetër e policisë lokale. Ajo theksoi se është ende shumë herët për të konfirmuar nëse incidenti ka lidhje me terrorizmin.
“Nuk kemi asnjë tregues që sugjeron se mund të kemi të bëjmë me një sulm terrorist,” tha politikani zviceran Romain Collaud, një këshilltar shteti, për transmetuesin zvicerano-francez RTS të mërkurën në mëngjes, duke shtuar se hetimet janë duke vazhduar.
Policia bëri të ditur se tre persona të lënduar janë dërguar në spital për trajtim mjekësor. Dy persona të tjerë të përfshirë në flakë morën ndihmë mjekësore në vendngjarje, por nuk ishte e nevojshme që të shtroheshin në spital.
Sipas autoriteteve, në mbrëmjen e së martës pasagjerët u panë duke ikur nga autobusi që ishte përfshirë nga flakët, të frikësuar dhe disa prej tyre të plagosur. Papaux theksoi se në këtë incident nuk ishte i përfshirë asnjë automjet tjetër.
Media zvicerane raportoi se në një video të xhiruar në vendngjarje një person i lënduar dëgjohet duke thënë: “Një burrë i vuri flakën vetes. Ai derdhi benzinë mbi veten dhe pastaj i vuri flakën vetes”.
Identifikimi i gjashtë viktimave pritet të zgjasë disa ditë, tha Collaud, duke shtuar se ende nuk dihet nëse personi që dyshohet se ka shkaktuar zjarrin ndodhet mes të vdekurve.
Presidenti zviceran Guy Parmelin shprehu ngushëllimet për viktimat dhe familjet e tyre, duke theksuar se rasti është në hetim.
“Më trondit dhe më trishton fakti që edhe një herë njerëzit kanë humbur jetën në një zjarr të rëndë në Zvicër”, tha ai në një deklaratë në platformën X, duke shtuar se hetimet janë duke vazhduar.
Në janar, Zvicra u përball me një tjetër tragjedi të rëndë kur një zjarr në një bar në resortin e skive Crans-Montana shkaktoi vdekjen e 41 personave dhe plagosjen e 115 të tjerëve.
“Plagët nga Crans-Montana janë ende të freskëta, duke nxitur reagime të forta sot”, tha Collaud. “Këto janë qartë ngjarje që askush nuk dëshiron t’i përjetojë ose t’i rijetojë. Megjithatë, ato duken pjesë e jetës së përditshme tani, duke ndodhur më shpesh në Zvicër dhe në mbarë botën, gjë që është për të ardhur keq”, shtoi ai.
