Ministria për Punë, Familje dhe Vlerat e Luftës Çlirimtare ka ndërmarrë një hap të ri institucional për të forcuar mekanizmat e shqyrtimit të ankesave dhe kërkesave të qytetarëve. Ministri Andin Hoti ka njoftuar krijimin e katër komisioneve të posaçme, me synimin që çdo rast të trajtohet në përputhje me ligjin dhe me standarde të barazisë.
Komisionet e themeluara janë:
Komisioni i Ankesave për shtesat e fëmijëve dhe shtesat për lehona
Komisioni i Ankesave për ndihmën sociale
Komisioni zbatues për shqyrtimin e kërkesave nga programi pilot SAS
Komisioni i Ankesave për programin pilot SAS
Ministri Hoti ka ftuar qytetarët që në rast se konsiderojnë se u është shkelur ndonjë e drejtë, t’u drejtohen komisioneve përkatëse për shqyrtim. “Çdo rast do të trajtohet me seriozitet dhe paanshmëri. Angazhimi im mbetet i qartë: trajtim i barabartë për secilin, zbatim strikt i ligjit dhe asnjë tolerim ndaj padrejtësive”, ka deklaruar Hoti.
Sipas njoftimit, qytetarët kanë mundësi të paraqesin ankesat dhe kërkesat e tyre pranë këtyre komisioneve, me qëllim garantimin e një procesi të drejtë dhe transparent.
