Objekti i Ambasadës së Republikës së Kosovës në Berlin është bërë shënjestër e një akti vandalizmi. Ministria e Punëve të Jashtme dhe Diasporës ka bërë të ditur se në ambientet e jashtme të ambasadës janë vendosur etiketa fyese me përmbajtje shoviniste në gjuhën serbe, mbi pallatin identifikues të objektit diplomatik.
Sipas njoftimit, mbishkrimet përmbanin slogane nacionaliste dhe nxitëse, përfshirë mesazhe si “Nuk ka dorëzim”, “Kosova është Serbi” dhe thirrje të tjera me konotacion propagandistik dhe përçarës.
Pas evidentimit të rastit, Ambasada e Republikës së Kosovës në Berlin ka njoftuar menjëherë autoritetet gjermane. Policia është informuar dhe pritet të ndërmarrë veprimet përkatëse në vendngjarje, përfshirë hetimin e plotë të rrethanave dhe identifikimin e personave përgjegjës.
Në reagimin zyrtar thuhet se Ministria e Punëve të Jashtme dhe Diasporës dënon fuqishëm çdo akt vandalizmi, gjuhë urrejtjeje dhe çdo përpjekje për të cenuar përfaqësitë diplomatike të Republikës së Kosovës. Veprime të tilla cilësohen të papranueshme dhe në kundërshtim me normat dhe konventat ndërkombëtare që garantojnë paprekshmërinë e misioneve diplomatike, si dhe dëmtojnë frymën e bashkëjetesës dhe respektit ndërmjet shteteve.
“Republika e Kosovës mbetet e përkushtuar ndaj promovimit të paqes, dialogut, bashkëpunimit dhe marrëdhënieve të mira ndërkombëtare, duke vazhduar të ushtrojë misionin e saj diplomatik në përputhje të plotë me parimet dhe standardet ndërkombëtare”, shkruhet mes tjerash në reagim.
