Një i dënuar që po trajtohej në QKUK ka arritur të arratiset në orët e para të mëngjesit të së premtes. Rasti ka ndodhur disa ditë pasi ai ishte dërguar për trajtim mjekësor nga institucioni korrektues ku po vuante dënimin.
Sipas njoftimit të Shërbimi Korrektues i Kosovës, i burgosuri ishte hospitalizuar më 16 shkurt, ndërsa në momentin e largimit ndodhej në repartin e Onkologjisë, në katin e dytë, dhoma nr. 2, së bashku me pacientë të tjerë.
I arratisuri, me inicialet F.M., po vuante dënimin në Qendrën Korrektuese të Dubravës.
“I njëjti është i dënuar për Veprën Penale Vjedhje e Rëndë, është arrestuar më 24.10.2025 dhe është duke mbajtur dënimin me burgim në kohëzgjatje prej katër (4) vitesh dhe do të lirohej më 08.06.2029”.
“Menjëherë pas rastit, është njoftuar Policia e Kosovës dhe është themeluar komision i brendshëm hetimor administrativ për të shqyrtuar rrethanat e arratisjes dhe dyshimet për shkelje eventuale nga zyrtarët korrektues që kanë qenë përgjegjës për sigurinë dhe prezencën e tij”, ka thënë ShKK.
Komisioni disiplinor, si masë e menjëhershme, ka pezulluar nga puna dy zyrtarë korrektues deri në përfundim të procedurave hetimore.
Pas pranimit të raportit nga komisioni hetimor, Shërbimi Korrektues i Kosovës thotë se do të ndërmarrë masat përkatëse në përputhje me gjetjet dhe rekomandimet që do të dalin nga ky proces.
