Platforma e njohur e komunikimit online për komunitetet e lojtarëve po tërhiqet përkohësisht nga plani për të zbatuar në shkallë globale sistemin e ri të verifikimit të moshës. Vendimi vjen pas reagimeve të forta nga përdoruesit, të cilët ngritën shqetësime serioze për privatësinë dhe mënyrën e mbledhjes së të dhënave.
Discord ka njoftuar se zbatimi global i sistemit të ri është shtyrë për në gjysmën e dytë të vitit 2026. Lajmin e bëri të ditur Drejtori i Teknologjisë dhe bashkëthemeluesi i kompanisë, Stanislav Vishnevskiy.
Platforma, e cila sipas vetë kompanisë ka mbi 200 milionë përdorues aktivë, do të vazhdojë të përmbushë detyrimet ligjore specifike që lidhen me verifikimin e moshës. Megjithatë, zgjerimi global i sistemit do të realizohet vetëm pasi të bëhen ndryshime në politikën fillestare të prezantuar në fillim të shkurtit.
Më herët gjatë këtij muaji, kompania kishte njoftuar se në mars do të lansonte një politikë të re verifikimi, e cila përfshinte skanimin e fytyrës ose ngarkimin e një dokumenti identifikimi për përdoruesit, moshën e të cilëve sistemi nuk arrinte ta përcaktonte si të rritur. Kjo lëvizje shkaktoi reagime të menjëhershme dhe zemërim nga një pjesë e përdoruesve.
Sipas kompanisë, në shumicën dërrmuese të rasteve ajo është në gjendje të përcaktojë moshën në mënyrë proaktive duke analizuar sinjale në nivel llogarie. Këto përfshijnë kohëzgjatjen e ekzistencës së llogarisë, praninë e një metode pagese të regjistruar, llojin e serverave ku është i përfshirë përdoruesi dhe modelet e përgjithshme të aktivitetit.
Vishnevskiy theksoi se kompania nuk lexon mesazhe, nuk analizon biseda dhe nuk shqyrton përmbajtjen e llogarisë për të vlerësuar moshën e përdoruesve.
Për një pakicë përdoruesish, moshën e të cilëve sistemi nuk arrin ta konfirmojë, Discord po punon për të ofruar alternativa shtesë përtej skanimit të fytyrës dhe kërkesës për dokument identifikimi. Ndër opsionet e reja përfshihet edhe verifikimi përmes kartës së kreditit. Kompania ka bërë të ditur se do të “plotësojë dhe zgjerojë” këto alternativa përpara se të nisë zbatimin e sistemit të ri.
Përdoruesit që zgjedhin të mos verifikojnë moshën e tyre do të mund të mbajnë llogarinë, serverat, listën e miqve, mesazhet direkte dhe bisedën zanore. Megjithatë, ata nuk do të kenë qasje në përmbajtje të kufizuar sipas moshës dhe nuk do të mund të ndryshojnë disa cilësime të paracaktuara sigurie, të cilat janë të dizajnuara për mbrojtjen e adoleshentëve.
