Udhëtimi me aeroplan konsiderohet një nga mënyrat më të sigurta të transportit, megjithatë shumë pasagjerë e bëjnë të njëjtën pyetje: pse nuk ka parashuta për secilin në rast emergjence? Në pamje të parë duket si masë shtesë sigurie, por në praktikë kjo zgjidhje është e pazbatueshme për disa arsye konkrete.
Mungesa e parashutave në aeroplan lidhet me disa faktorë. Së pari, trafiku ajror është ndër më të sigurtit. Probabiliteti për të vdekur gjatë një fluturimi është 1:11,000,000, ndërsa në trafikun rrugor raporti është 1:5,000.
Edhe pse aksidentet janë të mundshme, dhe stjuardesat i përgatisin pasagjerët për situata të ndryshme – si vendosja e maskës së oksigjenit apo rripit të shpëtimit – përdorimi i parashutës nuk është zgjidhje reale në shumicën e rasteve.
Një nga arsyet kryesore lidhet me kushtet e fluturimit. Avioni fluturon në lartësinë 10,000 km, me shpejtësi 800-1000 km/h. Në këto lartësi temperatura varion nga -40 deri në -60 gradë Celsius dhe praktikisht mungon oksigjeni. Në këto kushte, një person nuk do të mund të mbijetonte, çka e bën parashutën të padobishme.
Po ashtu, shumica e aksidenteve ndodhin gjatë ngritjes dhe uljes. Në këto faza, pasagjerët nuk do të kishin kohë për të përdorur parashutën. Në një lartësi kaq të ulët, ajo nuk do të hapej në kohë.
Një tjetër faktor është psikologjik. Prania e parashutave mund të shtojë ankthin tek disa pasagjerë. Për shumë njerëz, vetë fluturimi shkakton pasiguri; shtimi i një parashute në kabinë mund të rrisë ndjesinë e rrezikut dhe panikun.
Paniku është gjithashtu problem praktik. Në rast emergjence, shumica e pasagjerëve nuk do të dinin si ta vendosnin siç duhet parashutën, as si të vepronin me qetësi për t’u hedhur nga avioni. Trajnimi i mijëra pasagjerëve për një situatë të tillë do të ishte pothuajse i pamundur.
Edhe pse parashutat janë të shtrenjta, kjo nuk është arsyeja kryesore e mungesës së tyre. Ato do t’i shtonin peshë të konsiderueshme avionit, gjë që ndikon drejtpërdrejt në konsumin e karburantit dhe performancën. Për më tepër, do të zinin hapësirë të vlefshme për bagazhe, e cila është e domosdoshme, sidomos në udhëtime të gjata apo kur pasagjerët udhëtojnë me fëmijë.
