Historia e shtypit shqiptar nis jashtë kufijve të Shqipërisë, në mesin e shekullit XIX. Në një kohë kur idetë kombëtare po merrnin formë dhe komuniteti arbëresh në Itali kërkonte të forconte identitetin e vet kulturor e politik, u hodhën themelet e gazetarisë shqiptare.
Më 23 shkurt të vitit 1848 u botua në Napoli gazeta e parë në historinë e shtypit shqiptar, “L’albanese d’Italia”. Ky botim periodik cilësohet si gur themeli i shtypit kombëtar. Gazeta “L’albanese d’Italia” drejtohej nga shkrimtari arbëresh, Jeronim De Rada, një prej figurave qendrore të periudhës së Rilindjes.
Gazeta, e shkruar kryesisht në gjuhën italiane dhe pjesërisht në arbërisht, shërbeu si një tribunë e komunikimit të mesazheve politike, shoqërore e kulturore, në përpjekje për të krijuar dhe informuar opinionin publik të komunitetit arbëresh në Itali. Në disa prej numrave të saj janë publikuar lajme të shumta mbi zhvillimet në Shqipëri dhe në rajonin e Ballkanit.
De Rada, i cili gëzon atributet e “babait” të gazetarisë shqiptare, përveç konceptimit të periodikut, kishte marrë nën ngarkim të plotë kryerjen e çdo procesi të parashikuar, deri te shtypshkrimi i përmbajtjes. Më pas ai u ndihmua nga studenti Nicola Castagna.
Personaliteti i botës arbëreshe ndërmori në vitin 1883 edhe botimin e revistës së parë në gjuhën shqipe, “Flamuri i Arbërit”.
