Ministria e Bujqësisë, Pylltarisë dhe Zhvillimit Rural, së bashku me Agjencinë e Ushqimit dhe Veterinarisë (AUV), kanë njoftuar për tërheqjen e menjëhershme nga tregu të një produkti ëmbëlsirash me xhelatinë, pas një njoftimi të pranuar përmes Sistemit të Alarmimit të Shpejtë për Ushqim dhe Ushqim për Kafshë (RASFF).
Bëhet fjalë për karamelet me xhelatinë “Hello Kitty Apfel Koniac Gelee”, të prodhuara nga kompania Sanrio Co., LTD. në Tokio, Japoni dhe të eksportuara nga Holanda. Njoftimi me numër 2026.1424 paralajmëron për rrezik të mundshëm nga konsumimi i këtij produkti.
Si masë parandaluese për mbrojtjen e shëndetit publik, AUV ka urdhëruar largimin e menjëhershëm të produktit nga tregu dhe asgjësimin e tij. Të gjitha bizneset që posedojnë këtë produkt me datë skadimi 11/06/2026 dhe peshë 150 gram janë të obliguara të ndërpresin menjëherë shitjen dhe ta kthejnë mallin tek furnizuesit përkatës.
Njëkohësisht, konsumatorët që e kanë blerë këtë produkt këshillohen të mos e përdorin.
Autoritetet theksojnë se do të vazhdojnë monitorimin e tregut dhe zbatimin e masave kontrolluese, me synim garantimin e sigurisë ushqimore dhe mbrojtjen e shëndetit të qytetarëve në Republikën e Kosovës.
