Sëmundjet kronike të veshkave dhe dëmtimet akute të tyre po kthehen në një problem serioz shëndetësor në mbarë botën. Ato rrisin rrezikun për sëmundje kardiovaskulare, diabet, hipertension, obezitet, si dhe infeksione si HIV, malaria, tuberkulozi dhe hepatiti. Tek fëmijët, pasojat nuk ndalen në fëmijëri, por shpesh vazhdojnë edhe në moshë madhore.
Problemi
Pavarësisht rritjes së rasteve, pabarazitë në kujdesin shëndetësor mbeten të theksuara. Faktorë si varfëria, mungesa e arsimit, diskriminimi gjinor, kushtet e punës dhe ndotja ndikojnë drejtpërdrejt në përhapjen e sëmundjeve të veshkave.
Transplantimi konsiderohet trajtimi më me kosto efektive për sëmundjet kronike të veshkave, por mungesa e infrastrukturës dhe paragjykimet kulturore ndaj dhurimit të organeve bëjnë që në shumë vende dializa të mbetet zgjidhja kryesore.
Edhe pse shumë shtete kanë strategji për sëmundjet jo të transmetueshme, 53% e tyre nuk kanë udhëzues specifikë për menaxhimin e sëmundjeve kronike të veshkave.
Këtë vit, Dita Botërore e Veshkave synon të rrisë ndërgjegjësimin për barrën në rritje të këtyre sëmundjeve.
“Veshka të shëndetshme për të gjithë” bën thirrje për mbulim shëndetësor universal për parandalimin dhe trajtimin e hershëm të sëmundjeve të veshkave.
Në fokus janë: promovimi i stilit të shëndetshëm të jetesës, depistimi i hershëm me analiza të urinës dhe gjakut, sigurimi i trajtimit bazë pa barrë financiare dhe akses i barabartë në dializë e transplant.
Rreth 850 milionë njerëz në botë jetojnë me sëmundje të veshkave. Sëmundjet kronike shkaktojnë të paktën 2.4 milionë vdekje në vit, ndërsa dëmtimet akute prekin mbi 13 milionë persona, kryesisht në vendet me të ardhura të ulëta dhe të mesme, duke shkaktuar rreth 1,7 milionë vdekje çdo vit.
