Kryeministri Albin Kurti ka zhvilluar një takim me juristin e njohur ndërkombëtar Geoffrey Nice, i cili ishte i shoqëruar nga avokati Taulant Hodaj.
Gjatë takimit, Nice e uroi Kurtin për rizgjedhjen në detyrën e kryeministrit.
Biseda mes tyre u fokusua në bashkëpunimin e mëhershëm të Nice me Qeverinë e Kosovës, si dhe në tema që lidhen me të drejtën ndërkombëtare dhe funksionimin e Gjykatës Speciale.
“Në veçanti, Kryeministri e informoi z. Nice për përpjekjet e deritanishme të Qeverisë së Kosovës për të përkrahur, në forma të ndryshme dhe brenda kornizës ligjore, të akuzuarit e kësaj Gjykate. Nga ana e tij, Nice shprehu gatishmërinë për të vazhduar bashkëpunimin me Qeverinë e Kosovës edhe në të ardhmen”, thuhet në një njoftim të zyrës së Kurtit për këtë takim.
Geoffrey Nice është jurist dhe avokat me reputacion ndërkombëtar, me përvojë të gjatë në fushën e së drejtës penale ndërkombëtare dhe së drejtës ndërkombëtare publike.
Ai ka shërbyer si prokuror në Gjykatën Penale Ndërkombëtare për ish-Jugosllavinë (ICTY), ku ka udhëhequr ndjekjen penale në rastin kundër Sllobodan Millosheviqit. Përvoja e tij në trajtimin e krimeve ndërkombëtare, përgjegjësisë shtetërore dhe çështjeve komplekse juridike e ka bërë atë një nga emrat më të respektuar në këtë fushë.
