Një 18-vjeçare ka mbetur e plagosur me armë zjarri pas mesnate në Tiranë, në rrethana që po hetohen nga autoritetet. Ngjarja ka ndodhur në ambientet e një hoteli në zonën e Saukut, ndërsa e reja është jashtë rrezikut për jetën.
Sipas Policisë, rasti është raportuar rreth orës 00:15, kur e reja është paraqitur në spital me plagë të shkaktuar nga arma e zjarrit. Hetimet paraprake tregojnë se ajo dyshohet se është vetëplagosur.
Në lidhje me rastin janë arrestuar Vladimir Gjuta, 46 vjeç, dhe Mirvete Rexhmati (Gjuta), 48 vjeçe, për veprat penale “Moskallëzim i krimit” dhe “Veprime që pengojnë zbulimin e së vërtetës”.
Po ashtu, janë shpallur në kërkim shtetasit S. Gj., 49 vjeç, dhe E. Gj., 24 vjeç, për veprat penale “Moskallëzim i krimit” dhe “Veprime që pengojnë zbulimin e së vërtetës”, si dhe shtetasi E. Gj., 22 vjeç, për veprat penale “Moskallëzim i krimit”, “Veprime që pengojnë zbulimin e së vërtetës” dhe “Armëmbajtja pa leje”.
Burime bëjnë me dije se 22-vjeçari i shpallur në kërkim është i dashuri i vajzës së plagosur dhe djali i të arrestuarës. 18-vjeçarja, e cila dyshohet se ka qëlluar veten, në dëshminë paraprake ka deklaruar se ka bërë disa gabime në jetë. Mjekët konfirmojnë se ajo ndodhet jashtë rrezikut për jetën.
“Më datë 14.02.2026, rreth orës 00:15, në spital është paraqitur e plagosur me armë zjarri shtetasja N. M., 18 vjeçe, e cila ndodhet jashtë rrezikut për jetën.
Nga veprimet e shpejta hetimore të kryera nga specialistët për Hetimin e Krimeve kundër Jetës dhe Pronës, si dhe nga këqyrja e pamjeve të kamerave të sigurisë, rezultoi se ngjarja ka ndodhur në ambientet e një subjekti në Sauk, ku 18-vjeçarja dyshohet se është vetëplagosur me armë zjarri.
E dëmtuara është transportuar në spital nga shtetasja Mirvete Rexhmati(Gjuta) dhe shtetasi E. Gj., 24 vjeç.
Lidhur me ngjarjen u arrestuan në flagrancë shtetasit Vladimir Gjuta 46 vjeç dhe Mirvete Rexhmati(Gjuta), 48 vjeçe, për veprat penale “Moskallëzim i krimit” dhe “Veprime që pengojnë zbulimin e së vërtetës”.
Gjithashtu, u shpallën në kërkim shtetasit S. Gj., 49 vjeç, dhe E. Gj., 24 vjeç, për veprat penale “Moskallëzim i krimit” dhe “Veprime që pengojnë zbulimin e së vërtetës”, si dhe shtetasi E. Gj., 22 vjeç, për veprat penale “Moskallëzim i krimit”, “Veprime që pengojnë zbulimin e së vërtetës” dhe “Armëmbajtja pa leje””, bëri me dije policia.
Sipas dyshimeve, këta shtetas kanë prishur provat në vendin e ngjarjes dhe nuk e kanë kallëzuar krimin.
Autoritetet po vijojnë punën për gjetjen dhe sekuestrimin e armës së zjarrit të përdorur, si dhe për kapjen e tre personave të shpallur në kërkim, me qëllim zbardhjen e plotë ligjore të rastit.
