Festivali ndërkombëtar i fotografisë “Fotoist” ka nisur edicionin e tij të tretë në Prishtinë me ekspozitën e fotografit të njohur amerikan, Ron Haviv, e cila sjell imazhe tronditëse nga zonat e luftës në botë, përfshirë edhe Kosovën. Në qendër të ekspozitës “A Brief Guide to Investigating War Crimes” janë dëshmitë vizuale të krimeve të luftës dhe ndikimet e tyre afatgjata, duke i dhënë publikut një pasqyrë të fortë të realitetit brutal të konflikteve.
Ngjarja shërbeu gjithashtu si homazh për dy fotoreporterë që lanë gjurmë të thella në dokumentimin e luftës – Alban Bujarin dhe Paul Lowe. Fotot e Bujarit, pjesë e ekspozitës “Erë gjaku”, u shfaqën si një nën-ekspozitë brenda “Fotoistit”, duke sjellë në kujtesë rrëfimet e tij të ndjera përmes imazheve që flasin për dhimbje, humbje dhe dinjitet njerëzor.
Drejtori i festivalit, Burim Myftiu, tha se edicioni i sivjetmë përfshin 36 ngjarje fotografike në disa hapësira të qendrës “Barbar” në hotelin “Grand”, ku përveç fotografisë janë përfshirë edhe ekspozita tematike për periudha historike dhe sociale.
Në ceremoninë e hapjes, ministri i Kulturës, Hajrulla Çeku, theksoi rëndësinë e dokumentimit të së kaluarës dhe rolin e fotografëve që sollën të vërtetën e luftës kosovare në sytë e botës.
Ron Haviv, i cili ka dokumentuar konflikte në Kosovë, Bosnjë, Ruandë, Ukrainë e Gaza, tha se fotografia është një mënyrë për të mbajtur gjallë kujtesën dhe për të parandaluar përsëritjen e tragjedive.
Festivali “Fotoist” do të vazhdojë deri më 24 tetor, duke sjellë për publikun një seri ekspozitash që trajtojnë temën e luftës, njerëzimit dhe fuqisë së imazhit për të treguar të vërtetën. /Gjurmuesi/
