Kërkimi i diagnozave apo këshillave shëndetësore përmes inteligjencës artificiale mund të mos jetë aq i sigurt sa mendohet. Një studim i fundit ngre shqetësime serioze për përdorimin e chatbot-eve në vendimmarrje mjekësore, duke e cilësuar këtë praktikë si potencialisht të rrezikshme për pacientët.
Studimi është publikuar në revistën Nature Medicine dhe është udhëhequr nga Instituti Oxford Internet dhe Departamenti Nuffield i Shkencave Shëndetësore të Kujdesit Parësor në Universitetin e Oksfordit. Sipas gjetjeve, mbështetja te inteligjenca artificiale për vendime mjekësore bart rreziqe për shkak të një “tendence për të ofruar informacione të pasakta dhe të paqëndrueshme”.
Rebecca Payne, bashkautore e studimit dhe mjeke e përgjithshme, theksoi se, pavarësisht entuziazmit të madh rreth teknologjisë, ajo ende nuk është në nivelin për të zëvendësuar rolin e mjekut.
“Pacientët duhet të jenë të vetëdijshëm se pyetja e një modeli të madh gjuhësor për simptomat e tyre mund të jetë e rrezikshme, duke dhënë diagnoza të gabuara dhe duke dështuar të njohë kur nevojitet ndihmë urgjente”, theksoi ajo.
Në kuadër të studimit, rreth 1.300 pjesëmarrësve iu paraqitën skenarë të ndryshëm dhe u kërkua të identifikonin gjendje të mundshme shëndetësore si dhe të sugjeronin hapat e ardhshëm.
Një pjesë e tyre përdorën softuerë të bazuar në modele të mëdha gjuhësore për të marrë një diagnozë të mundshme, ndërsa të tjerët u mbështetën në qasje tradicionale, si konsultimi me një mjek të përgjithshëm.
Rezultatet treguan se mjetet e inteligjencës artificiale shpesh ofronin një “përzierje informacioni të mirë dhe të keq”, gjë që e bënte të vështirë për përdoruesit të dallonin saktësinë e informacionit.
Edhe pse chatbot-et “shkëlqejnë në testet e standardizuara të njohurive mjekësore”, studimi përfundon se përdorimi i tyre në situata reale si mjete mjekësore “do të paraqiste rreziqe për përdoruesit realë që kërkojnë ndihmë për simptomat e tyre”.
Autori kryesor i studimit, Andrew Bean, theksoi se ndërveprimi me njerëzit mbetet “një sfidë” edhe për sistemet më të avancuara të inteligjencës artificiale, duke shtuar se shpreson që këto gjetje të kontribuojnë në zhvillimin më të sigurt të teknologjive të tilla në të ardhmen.
