Historia e një qeni që kaloi një dekadë pranë varrit të pronarit të tij ka prekur opinionin publik në Brazil dhe ka shërbyer si shtysë për ndryshime ligjore. Në një shtet brazilian tashmë lejohet që kafshët shtëpiake të varrosen së bashku me familjarët e tyre, falë një ligji të frymëzuar nga ky rast i rrallë besnikërie.
Qeni, i njohur si Bob Coveiro – që në portugalisht do të thotë “varrmihës” – jetoi për 10 vjet në varrezat e Sao Paulos, aty ku ishte varrosur pronari i tij. Ai u kthye në një figurë të përhershme të varrezave, duke u ofruar ngushëllim personave në zi, deri në ngordhjen e tij në vitin 2021, kur edhe vetë u varros pranë kujdestarit.
Ligji që mban emrin e tij hyri në fuqi të martën dhe, sipas qeverisë së shtetit, njeh “lidhjen emocionale” mes kafshëve shtëpiake dhe familjeve të tyre njerëzore.
Një nga autorët e ligjit, deputeti Eduardo Nobrega, ka shkruar në rrjetet sociale se “Ajo që filloi si një histori dashurie dhe besnikërie është kthyer në politikë publike”.
Sipas mediave braziliane, Bob kishte marrë pjesë në funeralin e pronarit të tij në varrezat e Taboao da Serra dhe më pas kishte refuzuar të largohej. Madje, ai ishte rikthyer sërish në varreza pasi familjarët ishin përpjekur ta mbanin në shtëpi.
Atij iu ndërtua një shtëpizë e gjelbër për qen në varreza, ku jetoi për vite me radhë. Ai njihej për faktin se shoqëronte procesionet mortore, derisa në vitin 2021 u godit nga një automjet. Pas vdekjes, u varros pranë pronarit të tij.
Organizata lokale për mbrojtjen e kafshëve Patre, e cila organizoi një fushatë për mbledhjen e fondeve për ngritjen e një statuje në kujtim të tij, ka deklaruar se Bob “fitoi zemrat e të gjithëve që e takuan”.
“Njerëzit që ishin të pikëlluar duke varrosur të dashurit e tyre arrinin të buzëqeshnin kur qeni i vogël, i çmendur pas topave, përpiqej të luante”, thuhej në një deklaratë.
Brazili renditet ndër vendet me numrin më të madh të kafshëve shtëpiake në botë. Sipas Institutit Pet Brasil, në vend jetojnë rreth 160 milionë kafshë shoqëruese, duke e bërë atë popullsinë e tretë më të madhe globale në këtë drejtim.
