Instituti i Kosovës për Drejtësi (IKD) ka depozituar një padi në Gjykatën Supreme, duke kërkuar shfuqizimin e dispozitave të Nenit 18, paragrafi 7 dhe fusnotës 16 të Rregullores për Procedurat Përzgjedhëse lidhur me Emërimin, Avancimin dhe Rizgjedhjen e Personelit Akademik në Universitetin e Prishtinës “Hasan Prishtina”. IKD argumenton se këto dispozita janë të kundërligjshme, cenojnë të drejtat e palëve, kanë efekt retroaktiv dhe nuk përputhen me standardet e Gjykatës Evropiane për të Drejtat e Njeriut, duke cenuar pritjet legjitime dhe të drejtën në pronë.
Padia e dorëzuar më 5 shkurt 2026 sqaron se më 3 qershor 2025, Senati i UP-së miratoi Rregulloren, ku fusnota 16 përcakton kritere të detyrueshme për vlerësimin e punimeve shkencore. IKD vlerëson se kjo fusnotë ka karakter normativ dhe nuk është thjesht shpjeguese, pasi vendos standarde të drejtpërdrejta që ndikojnë në procedurat për emërim, avancim dhe rizgjedhje të personelit akademik.
Sipas padisë, Neni 18, paragrafi 7 i Rregullores u jep komisioneve dhe Senatit një kompetencë diskrecionale të gjerë, duke mundësuar tërheqjen e njohjes së publikimeve në revista të dyshimta pa kriter të qartë, gjë që mund të penalizojë kandidatët edhe kur punimet e tyre janë publikuar në mënyrë të rregullt sipas kritereve në fuqi.
IKD vlerëson se Rregullorja krijon dy standarde të ndryshme vlerësimi, të cilat përzihen dhe mbivendosen, duke rritur rrezikun e arbitraritetit në vendimmarrje. Kjo, sipas Institutit, cenon sigurinë juridike, pritjet legjitime dhe të drejtat pasurore e profesionale të kandidatëve.
Përmes padisë, IKD kërkon që paragrafi 7 i Nenit 18 dhe fusnota 16 të shpallen të paligjshme dhe të shfuqizohen. Po ashtu, kërkohet që Universiteti i Prishtinës të detyrohet të paguajë shpenzimet procedurale brenda 15 ditëve pas plotfuqishmërisë së aktgjykimit.
