Brigjet e liqenit Mar Chiquita në Argjentinë u shndërruan në një arenë të pazakontë këtë fundjavë, ku qindra qytetarë u mblodhën me një synim të vetëm: thyerjen e një rekordi botëror Guinness. Aktiviteti u zhvillua të dielën dhe tërhoqi pjesëmarrës nga zona të ndryshme të vendit.
Ngjarja u organizua në kuadër të edicionit të dytë të “Festival de la Planchita”, i mbajtur në qytetin Miramar. Organizatorët kishin si objektiv të mblidhnin më shumë se 1,941 persona, numër ky që do të mjaftonte për të kaluar rekordin ekzistues për numrin më të madh të njerëzve që notojnë njëkohësisht.
Rekordi aktual daton nga viti 2017 dhe është vendosur në liqenin Epecuén, gjithashtu një lagunë e kripur në Argjentinë, ku 1,941 pjesëmarrës arritën të formojnë një zinxhir të madh lundrues mbi ujë.
Për të realizuar këtë sfidë, organizatorët duhet të koordinojnë të paktën 1,942 persona që të notojnë pa asnjë ndihmë artificiale dhe të qëndrojnë në ujë për një periudhë të caktuar kohore, sipas rregullave të Guinness World Records.
Liqeni Mar Chiquita konsiderohet veçanërisht i përshtatshëm për këtë lloj aktiviteti, për shkak të përqendrimit të lartë të kripës në ujë. Kjo veçori krijon lundrueshmëri natyrore, duke ua bërë më të lehtë qëndrimin mbi ujë edhe notarëve fillestarë.
