Një histori e pazakontë ka ardhur nga Shtetet e Bashkuara, ku një burrë nga Mississippi është ribashkuar me unazën e tij të humbur prej më shumë se katër dekadash, pas një rasti krejtësisht të papritur.
Darien Ladner tregoi se unazën e kishte humbur në vitin 1982, gjatë pjesëmarrjes në një festë me miq në plazhin Pass Christian. Pavarësisht përpjekjeve të shumta për ta gjetur atë, kërkimet e tij në atë kohë nuk dhanë rezultat.
“E kërkova e kërkova, por nuk e gjeta dot”, tha Ladner.
Ai shtoi se ishte kthyer më vonë në plazh edhe me një detektor metalesh, por pa sukses.
Pas 44 vjetësh, këtë javë ai mori një mesazh nga Sammy Jewell, i cili e njoftoi se kishte gjetur unazën gjatë kërkimit të thesarëve me detektorin e tij të metaleve në të njëjtin plazh.
“Nuk mund ta besoja, sepse kanë kaluar 44 vjet”, tha Ladner.
Sipas tij, unaza është ruajtur në gjendje shumë të mirë, me përjashtim të një gërvishtjeje të vogël, duke e bërë ribashkimin edhe më të veçantë.
