Presidenti i FIBA Europe, Jorge Garbajosa, ka mbërritur në Kosovë për një vizitë të veçantë, të cilën Federata e Basketbollit të Kosovës e konsideron historike.
Vizita e tij lidhet me organizimin e FIBA Europe Youth Commission më 17 tetor 2025, si dhe aktivitetin FIBA Europe U14 Get-Together, që do të zhvillohet nga 17 deri më 19 tetor në Prishtinë.
Eventet organizohen nga Federata e Basketbollit të Kosovës, në bashkëpunim me Ministrinë e Kulturës, Rinisë dhe Sportit dhe FIBA Europe. Sipas organizatorëve, këto aktivitete pritet të kontribuojnë në zhvillimin e basketbollit të të rinjve dhe të promovojnë imazhin ndërkombëtar të Kosovës në sport.
Vizita e Garbajosës shihet si një moment i rëndësishëm për komunitetin e basketbollit në vend, duke dëshmuar përfshirjen aktive të Kosovës në familjen evropiane të basketbollit. /Gjurmuesi/
