Qeveria australiane po përgatit një masë historike, duke planifikuar ndalimin e përdorimit të mediave sociale për fëmijët nën 16 vjeç, një hap i parë i këtij lloji në nivel global. Ky zhvillim po tërheq vëmendjen e vendeve të tjera, përfshirë Danimarkën, të cilat po e ndjekin me kujdes zbatimin e saj.
Përpara se rregullat të hyjnë në fuqi më 10 dhjetor, autoritetet kanë nisur një fushatë informuese për publikun, duke udhëzuar prindërit dhe edukuar komunitetin mbi mënyrat për të ndihmuar fëmijët të largohen nga platformat sociale. Në qendër të këtij ligji janë platforma të njohura si Facebook, Instagram, Snapchat, TikTok, X dhe YouTube, të cilat mund të përballen me gjoba deri në 50 milionë dollarë australianë (rreth 28 milionë euro), nëse nuk sigurojnë që të rinjtë nën 16 vjeç të mos kenë llogari aktive.
Ministrja e Komunikimit, Anika Wells, theksoi se qëllimi është të mbrohet fëmijëria e të rinjve dhe të sigurohet qetësi për prindërit. Ajo shtoi se synohet që adoleshentët australianë të kenë mundësi të zhvillojnë identitetin e tyre për tre vitet e para të adoleshencës pa ndërhyrjen e mediave sociale, duke iu referuar kështu moshës minimale të përdorimit prej 13 vjetësh që aktualisht zbatohet sipas standardeve amerikane për privatësinë.
Ndërkohë, vendet që ndajnë shqetësime lidhur me ndikimin e mediave sociale tek fëmijët po monitorojnë nga afër këtë iniciativë, duke e konsideruar një shembull të mundshëm për politikat e tyre kombëtare. /Gjurmuesi/
