Konsumimi i rregullt i lëngut të domates mund të sjellë përfitime të rëndësishme për shëndetin e zemrës, veçanërisht për personat që përballen me tension të lartë të gjakut. Studime shkencore sugjerojnë se kjo pije e thjeshtë mund të ndihmojë në uljen e presionit të gjakut dhe të kolesterolit të keq.
Tensioni i lartë i gjakut, i njohur ndryshe si hipertension, e detyron zemrën të punojë më fort për të pompuar gjakun në trup. Me kalimin e kohës, kjo gjendje mund të dëmtojë zemrën, arteriet dhe organet e tjera jetësore, duke rritur rrezikun për sulme në zemër dhe goditje në tru. Dieta luan rol kyç në menaxhimin e kësaj gjendjeje, ku ushqimet e pasura me kripë konsiderohen ndër faktorët kryesorë që duhen shmangur.
Në anën tjetër, ajo që konsumojmë mund të ketë edhe efekt pozitiv. Një studim i vitit 2019, i publikuar në revistën Food Science and Nutrition, rekomandoi konsumimin e përditshëm të lëngut të domates pa kripë për uljen e tensionit të gjakut.
Hulumtuesit nga Tokio zbuluan se pirja e rregullt e lëngut të domates ndihmon në uljen e ndjeshme të presionit të gjakut dhe të niveleve të kolesterolit LDL. Studimi përfshiu 481 pjesëmarrës, të cilëve iu dha qasje e lirë në lëng domatesh për një periudhë 12-mujore. Faktorët kardiovaskularë, përfshirë presionin e gjakut dhe yndyrat në gjak, u matën në fillim dhe në fund të studimit.
Pjesëmarrësit me hipertension ose parahipertension shënuan përmirësime të dukshme. Sasia ditore e konsumuar varionte nga 84 deri në 215 ml, me shumicën që pinin rreth 200 ml në ditë.
Autorët e studimit deklaruan:
“Tensioni i gjakut u ul ndjeshëm në 94 pjesëmarrës me parahipertension ose hipertension të patrajtuar. Nivelet e kolesterolit LDL në serum u ulën gjithashtu ndjeshëm në 125 pjesëmarrës me dislipidemi të patrajtuar.”
“Këto efekte të dobishme nuk ndryshonin midis gjinive ose grupmoshave. Nuk u vu re ndonjë ndryshim i rëndësishëm në stilin e jetës para dhe pas studimit. Marrja e lëngut të domates së pakripur përmirësoi presionin e gjakut sistolik dhe diastolik dhe nivelet e kolesterolit LDL tek banorët vendas japonezë në rrezik të sëmundjeve kardiovaskulare”, përfunduan ata.
Sipas studiuesve, një nga arsyet kryesore të këtij efekti pozitiv është likopeni – një antioksidant i fuqishëm që gjendet në domate.
“Domatet përmbajnë një sërë komponimesh bioaktive që i bëjnë ato, si dhe produktet e tyre të përpunuara si lëngu, të dobishme për shëndetin”, theksuan ata.
“Mbi të gjitha, likopeni është i njohur për aktivitetin e tij të fuqishëm antioksidues dhe aftësinë e tij për të parandaluar oksidimin e lipoproteinës me dendësi të ulët (LDL), e cila luan një rol kyç në zhvillimin dhe përparimin e arteriosklerozës. Disa studime epidemiologjike kanë sugjeruar që likopeni mund të kontribuojë në parandalimin e arteriosklerozës dhe sëmundjeve kardiovaskulare”, shtuan studiuesit.
Këto gjetje u përforcuan edhe nga një studim tjetër i publikuar në vitin 2023 në European Journal of Preventive Cardiology. Sipas tij, personat që konsumonin më shumë se 110 gramë domate në ditë kishin 36 për qind më pak rrezik për zhvillimin e hipertensionit, krahasuar me ata që konsumonin sasi shumë më të vogla.
Sipas udhëzimeve shëndetësore, personat nën moshën 80 vjeç konsiderohen me tension të lartë të gjakut nëse vlerat janë 140/90 mmHg ose më të larta te mjeku, apo 135/85 mmHg në matjet shtëpiake. Për moshat mbi 80 vjeç, këto kufij janë pak më të lartë.
Nëse keni shqetësime lidhur me tensionin e gjakut, këshillohet që të konsultoheni me mjekun tuaj.
