Gjykata Kushtetuese i ka dhënë të drejtë të pakufizuar Listës Serbe për të propozuar kandidatin e saj për nënkryetar të Kuvendit të Kosovës, edhe pasi të jenë ezauruar të gjithë emrat e deputetëve brenda afatit 30-ditor për konstituim. Sipas vendimit të Gjykatës, procedura e shortit nuk aplikohet për sa kohë Lista Serbe nuk refuzon të bëjë propozime.
Në aktgjykim theksohet se nënkryetari i serb i Kuvendit në legjislaturën e dhjetë duhet të jetë një nga nëntë deputetët e Listës Serbe, si shumicë brenda këtij komuniteti. E drejta e propozimit i takon vetëm shumicës së deputetëve të komunitetit serb dhe për sa kohë ata nuk refuzojnë, procedura e shortit nuk vjen në shprehje. Gjykata saktëson se edhe në rastet kur të gjithë kandidatët e propozuar konsumohen nga tri herë votimi, shumica mund të fillojë përsëri me të njëjtët kandidatë, brenda afatit 30-ditor për konstituim të Kuvendit.
“Gjykata thekson se as Kushtetuta, as Rregullorja e Kuvendit nuk bëjnë dallim mes deputetëve që përfaqësojnë komunitetin serb në Kuvend, qoftë përkatësia e tyre partiake apo ideologjike, dhe votimi për kandidatët mund të realizohet deri tri herë, me përjashtim të rasteve kur konsumohen të gjithë kandidatët e propozuar nga komuniteti”, thuhet në aktgjykim.
Legjislatura e nëntë shënoi zgjedhjen antikushtetuese të Nenad Rashiq si nënkryetar, pasi nuk ishin plotësuar kushtet për aktivizimin e procedurës së shortit. Kjo ndodhi për shkak të gatishmërisë së Slavko Simiq të propozojë përsëri të njëjtët emra në seancën e 10 tetorit.
Gjykata rikujton se mekanizmi i shortit aplikohet vetëm në raste të jashtëzakonshme, kur shumica e deputetëve nga komunitetet jo shumicë nuk propozon kandidatët e nevojshëm. Vendimi thekson përgjegjësinë e Listës Serbe për të siguruar kandidatët dhe të shumicës, përbërë nga Lëvizja Vetëvendosje, për të garantuar përfaqësimin e komunitetit serb në Kryesinë e Kuvendit.
“Propozimet nga grupet parlamentare duhet të synojnë arritjen e konsensusit, të sigurojnë votat e nevojshme dhe të rezultojnë në zgjedhjen e kandidatëve ashtu siç parashikohet me Kushtetutë. Shumica ka përgjegjësi për të garantuar përfaqësim efektiv të komuniteteve jo shumicë në institucionet shtetërore dhe Kryesinë e Kuvendit”, thuhet më tej në aktgjykim.
Rashiq u zgjodh më pas nënkryetar, pasi kryetari i Kuvendit, Dimal Basha, propozoi direkt emrin e tij, duke qenë se në 27 rundet e mëparshme të votimit për secilin deputet serb, asnjëri nuk arriti të merrte 61 votat e nevojshme.
