Një incident serioz i regjistruar në fundjavën e kaluar ka sjellë pasoja të rënda për tifozët e Interit në kampionatin italian. Autoritetet disiplinore të Serie A kanë reaguar ashpër pas zhvillimeve në ndeshjen e javës së 23-të ndaj Cremoneses.
Komiteti Disiplinor ka vendosur që tifozëve të klubit nga Milano t’u ndalohet pjesëmarrja në ndeshjet jashtë fushe në Serie A deri në fund të marsit të vitit 2026. Ky vendim vjen pas një akti të rrezikshëm të ndodhur në stadiumin “Giovanni Zini”.
Gjatë ndeshjes, një tifoz i Interit nga sektori i mysafirëve hodhi një fishekzjarr në drejtim të portierit vendas, Emil Audero. Pajisja piroteknike shpërtheu shumë pranë tij, duke rrezikuar seriozisht sigurinë e portierit dhe duke shmangur për pak një lëndim të rëndë.
Autoritetet e Serie A e cilësuan këtë veprim si krejtësisht të papranueshëm dhe vendosën masa të forta ndëshkuese. Vendimi do të prekë mijëra tifozë të Interit, të cilët nuk do të kenë mundësi ta mbështesin ekipin e tyre në ndeshjet vendimtare jashtë fushe gjatë muajve shkurt dhe mars.
Deri më tani, klubi zikaltër nuk ka reaguar zyrtarisht dhe nuk dihet nëse do të paraqesë ankesë ndaj këtij vendimi.
Vlen të theksohet se, pavarësisht incidentit, ndeshja u mbyll me fitore të Interit me rezultat 2-0.
