Banorët e Shën Pjetërburgut janë bërë dëshmitarë të një pamjeje të pazakontë natën e së dielës, kur qielli dukej sikur ishte ndriçuar nga më shumë se një Hënë, duke krijuar një skenë mbresëlënëse dhe të rrallë.
Pamjet e këtij fenomeni u përhapën me shpejtësi në rrjetet sociale, duke ngjallur kureshtje dhe habi te qytetarët. Shumë prej tyre e përshkruan pamjen si shfaqjen e katër hënave njëkohësisht.
Sipas shpjegimeve shkencore, bëhet fjalë për një iluzion optik të njohur si “paraselene”, i cili ndodh kur drita e Hënës thyhet dhe reflektohet nga kristalet e akullit në shtresat e larta të atmosferës.
Dritat e ndritshme që u formuan rreth Hënës krijuan përshtypjen e disa “hënave” shtesë, megjithatë nuk kishte asnjë objekt të ri qiellor. Ekspertët theksojnë se ky fenomen shfaqet më shpesh në kushte shumë të ftohta dhe ka vetëm karakter vizual, pa treguar ndonjë ndryshim real astronomik në Hënë apo në hapësirë.
