Forca e Sigurisë së Kosovës po merr pjesë në një nga ushtrimet më të rëndësishme shumëkombëshe të drejtuara nga NATO, duke kontribuar me kapacitetet e saj mjekësore në kuadër të ushtrimit fushor “KFOR 36”, që po zhvillohet në Gjermani.
Kontingjenti i FSK-së me kapacitete mjekësore ROL 1, që nga 24 janari i është bashkuar vendeve partnere të NATO-s në ushtrimin që po realizohet në Qendrën e Trajnimit JMRC Hohenfels. Sipas njoftimit zyrtar, FSK në këtë ushtrim është duke ofruar mbështetje reale mjekësore për të gjitha ushtritë pjesëmarrëse, në bashkëpunim të ngushtë me shërbimin mjekësor të Ushtrisë Amerikane.
Po ashtu, theksohet se pjesëtarët e FSK-së janë të angazhuar në trajnime të fushave specialistike dhe janë të përfshirë në skenarët e ushtrimit “KFOR 36”, me qëllim të shkëmbimit të përvojave profesionale me partnerët ndërkombëtarë.
“Gjatë kësaj kohe, janë duke realizuar trajnime dhe duke ofruar ligjërata në fushën e mjekësisë në bashkëpunim me personelin e ushtrisë amerikane për pjesëmarrësit e ushtrive partnere në ushtrim. Ligjëratat janë të fokusuara në temat: Prezantimi i PSO ROL 1 (Nivelin bazë të mbështetjes mjekësore në operacione ushtarake), Evakuimi mjekësor, Combat Life Saver (CLS), Shëndeti mendor, Menaxhimi i lëndimeve dhe qepja e plagëve (sutura), Menaxhimi i traumave të kokës, Marrja e mostrave të gjakut për laborator emergjent dhe vendosja e vijës venoze”.
Në njoftim po ashtu theksohet se “Ushtarakët tanë po tregojnë disiplinë, profesionalizëm, ndërveprueshmëri me partnerët për të shërbyer paqes dhe sigurisë globale”, duke vlerësuar rolin dhe angazhimin e FSK-së në këtë ushtrim ndërkombëtar.
