Një botim i ri studimor që trajton lidhjen mes letërsisë dhe identitetit kulturor shqiptar u prezantua në Prishtinë, në një aktivitet që mblodhi studiues dhe dashamirë të librit. Promovimi u mbajt në bibliotekën “Ernest Koliqi”, ku u diskutua gjerësisht për rolin e letërsisë në ruajtjen e kujtesës kolektive.
Me këtë rast u promovua libri “Etnoletra Shqipe – Raporti i letërsisë me etnokulturën e kombformimin”, i autorit Vehbi Miftari, botim i Akademisë së Shkencave të Shqipërisë dhe Toena (2025).
Vepra analizon raportin mes letërsisë shqipe dhe etnokulturës, duke e trajtuar tekstin letrar si një bartës të rëndësishëm të kujtesës kulturore dhe të identitetit kombëtar. Gjatë promovimit, u zhvilluan diskutime lidhur me ndikimin e letërsisë në formësimin e vetëdijes kulturore shqiptare.
Në fjalët e mbajtura gjatë aktivitetit u theksua veçanërisht rëndësia e qasjes ndërdisiplinore që ofron libri, duke ndërthurur etnologjinë, letërsinë dhe studimet kulturore në një lexim të ri të trashëgimisë shpirtërore shqiptare.
Të pranishmit e vlerësuan veprën si një kontribut të çmuar në fushën e studimeve humanistike, si dhe si një nxitje për reflektim mbi raportin mes traditës dhe modernitetit në letërsinë shqipe.
