Ministria e Arsimit ka njoftuar nisjen e procesit për rishikimin dhe përditësimin e kurrikulave lëndore dhe programeve mësimore për arsimin fillor (klasat 1–5) dhe arsimin e mesëm të ulët (klasat 6–9). Ky hap synon të modernizojë sistemin arsimor dhe të përmirësojë rezultatet e nxënësve në përputhje me Kornizën Kurrikulare dhe kurrikulat bërthamë.
Sipas njoftimit të Ministrisë, procesi i rishikimit do të fokusojë në rritjen e cilësisë, koherencës dhe harmonizimin me dokumentet strategjike dhe nevojat bashkëkohore të arsimit. Ky hap do të mundësojë gjithashtu zhvillimin e teksteve shkollore cilësore dhe burimeve të tjera mësimore, duke mbështetur procesin e të nxënit dhe duke lehtësuar ngarkesën e nxënësve, përfshirë edhe peshën e çantave shkollore.
Ministria ka theksuar se mbetet e përkushtuar në avancimin e arsimit përmes politikave të qëndrueshme, zhvillimit të kurrikulave bashkëkohore dhe ofrimit të teksteve shkollore cilësore, me qëllim krijimin e një sistemi arsimor që i përgjigjet nevojave të nxënësve, mësimdhënësve dhe zhvillimit afatgjatë të shoqërisë.
Njoftimi i plotë i Ministrisë:
“Po fillojmë procesin e rishikimit të kurrikulave lëndore dhe programeve mësimore për arsimin fillor (klasat 1–5) dhe arsimin e mesëm të ulët (klasat 6–9). Me këtë proces të përditësimit dhe modernizimit në përputhje me Kornizën Kurrikulare dhe kurrikulat bërthamë, synojmë ngritjen e rezultateve të nxënësve, zhvillimin e kompetencave dhe shkathtësive të tyre.”
“Rishikimi i kurrikulave dhe programeve mësimore me qëllim rritjen e cilësisë së tyre, koherencës dhe harmonizimit me dokumentet startegjike ashtu si dhe nevojave bashkëkohore, është thelbësor për të garantuar arritje më të mira të nxënësve. Ky proces do të mundësojë edhe zhvillimin dhe ofrimin e teksteve shkollore cilësore, burimeve të tjera mësimore që mbështesin procesin e të nxënit, lehtësimin e ngarkesës së fëmijëve dhe peshës së çantës.”
“Mbesim të përkushtuar në avancimin e cilësisë së arsimit përmes politikave të qëndrueshme, zhvillimit të kurrikulave bashkëkohore dhe ofrimit të teksteve shkollore cilësore, me qëllim krijimin e një sistemi arsimor që i përgjigjet nevojave të nxënësve, mësimdhënësve dhe zhvillimit afatgjatë të shoqërisë sonë.”
