Në 90-vjetorin e lindjes së një prej figurave më të mëdha të letërsisë shqiptare, Ismail Kadare, sot u prezantua para publikut statuja e tij. Ceremonia u zhvillua në ambientet e Bar Juvenilja, një vend me domethënie të veçantë për shkrimtarin, ku tashmë statuja do të qëndrojë si simbol për të gjithë dashamirësit e veprës së tij.
Statuja u prezantua në një ceremoni të veçantë, e cila u mbajt pikërisht në Bar Juvenilja, vendi ku Ismail Kadare kishte krijuar një ritual të përditshëm gjatë qëndrimeve të tij në Shqipëri. Ai konsumonte aty kafenë e mëngjesit, shpesh në shoqërinë e botuesit të shtëpisë botuese Onufri, Bujar Hudhri.
Në aktivitet morën pjesë figura të njohura të kulturës dhe artit shqiptar. E pranishme ishte edhe bashkëshortja e shkrimtarit, zonja Helena Kadare, e cila ndoqi ceremoninë së bashku me miq, studiues dhe admirues të veprës së Kadaresë.
Gjatë ceremonisë u recituan edhe poezi të Ismail Kadaresë. Dihet se përpara se të bëhej një nga romancierët më të njohur shqiptarë, ai e nisi rrugëtimin e tij letrar si poet. Ndër vëllimet e tij poetike përmenden “Kristal” dhe “Ca pika shiu ranë mbi qelq”.
Ismail Kadare mbetet një nga autorët më të rëndësishëm të letërsisë shqipe, me kryevepra që kanë shënuar breza të tërë lexuesish, si “Gjenerali i ushtrisë së vdekur”, “Kronikë në gur” dhe “Dimri i vetmisë së madhe”.
Shkrimtari u nda nga jeta në korrik të vitit 2024, por trashëgimia e tij letrare dhe kulturore do të mbetet përherë pjesë e kujtesës kolektive dhe e zemrave të shqiptarëve.
