Hetimet për parregullsi të mundshme në procesin zgjedhor në Malishevë kanë hyrë në një fazë të re. Prokuroria e Gjakovës ka zhvilluar një aksion të gjerë, në kuadër të dyshimeve për falsifikim të rezultateve zgjedhore.
Si rezultat i këtij veprimi, deri më tani janë shoqëruar 50 komisionerë, të cilët pritet të ballafaqohen me hetuesit policorë për sqarimin e dyshimeve të ngritura ndaj tyre.
Sipas informatave të siguruara nga gazetarja Qëndresa Tërshani, në total janë në kërkim rreth 68 komisionerë, mirëpo një pjesë e tyre aktualisht nuk ndodhen në Kosovë.
Tutje, bëhet e ditur se një nga sfidat kryesore mbetet sigurimi i avokatëve për të gjithë të dyshuarit, ndaj intervistimi i tyre pritet të nisë vetëm pasi të sigurohet mbrojtja ligjore për secilin.
